IIV YHXBB Farg‘ona viloyatida Lacetti rusumli ikkita transport vositasining haydovchilari yo‘l harakati qoidalarini qo‘pol tarzda buzib, harakatlanib yurgani aks etgan video yuzasidan ma’lumot berdi.
Ijtimoiy tarmoqlarda qora rangli ikkita Lacetti avtomobili yo‘l qoidalarini buzib, xavfli manyovrlarni bajargan holda harakatlanayotgani tasvirlangan video tarqaldi.
Ma’lum qilinishicha, videodagi holat Farg‘ona viloyati IIB YHXB xodimlari tomonidan o‘rganib chiqilgan. O‘rganishlar davomida Lacetti’lardan birini Qo‘qon shahrida yashovchi 24 yoshli R.R., ikkinchisini esa 21 yoshli M.S. boshqargani aniqlangan.
R.R.ga nisbatan Ma’muriy javobgarlik to‘g‘risidagi kodeksning 126-modda (ko‘zgusimon va (yoki) tusi o‘zgartirilgan (qoraytirilgan) oynali, shuningdek, tevarak-atrofni ko‘rishni cheklaydigan qoplamali transport vositalaridan foydalanish) 2-qismi, M.S.ga nisbatan esa 128-5-modda (transport vositalari haydovchilarining xalaqit berishi yoki avariya holatini yuzaga keltirishi, yo‘lning qarama-qarshi harakatlanish uchun mo‘ljallangan tomoniga yoki bo‘lagiga chiqish) 2-qismi tartibida ma’muriy bayonnoma rasmiylashtirilgan.
Avvalroq Toshkentda Spark oynasidan tanasini chiqarib, tik turgan holatda “syomka” qilgan shaxs javobgarlikka tortilgani, Qo‘yliqda Isuzu avtobusi va ikki yengil avtomobil to‘qnashgani to‘g‘risida xabar berilgandi.
Izoh (0)