Vazirlar Mahkamasi avtoxo‘jaligi 2021-yilda 5,5 mlrd so‘mlik avtomobil xarid qildi

O‘zbekiston Vazirlar Mahkamasi ijro apparati xo‘jalik faoliyati boshqarmasi avtoxo‘jaligi tomonidan 2021-yilda 5,5 milliard so‘mdan ortiq mahalliy avtomobillarni xarid qilish bo‘yicha shartnomalar imzolangan. Bu haqda Davlat xaridlari portalidagi ma’lumotlarga tayanib, Telegram’dagi “Davletovuz” kanali xabar berdi.

Ma’lum qilinishicha, 2021-yilning o‘tgan davri mobaynida hukumat boshqarmasi tomonidan 1 milliard 107 million so‘mga 3 ta Malibu 2 hamda 596 million so‘mga bitta Traverse avtomobili xarid qilingan. Shuningdek:

• 1 ta Lacetti-Comfort Plus — 115 million 607 ming so‘m;
• 1 ta Isuzu avtomobili — 399 million 500 ming so‘m;
• 1 ta Malibu 2 — 369 million so‘m;
• 19 ta Lacetti-Comfort Plus — 2 milliard 196 million 533 ming so‘m;
• 1 ta Lacetti-Comfort Plus— 115 million 607 ming so‘m;
• 1 ta Damas-2 — 78 million283 ming so‘m;
• 1 ta Malibu 2 — 369 million so‘m;
• 1 ta Lacetti-Comfort Plus — 115 million 607 ming so‘m;
• 1 ta Lacetti-Comfort Plus — 115 million 607 ming so‘m avtomobillari sotib olingan.

Eslatib o‘tamiz, 2020-yil noyabr oyi boshida Zarbdor tumani hokimi Zafar Ro‘ziyev Captiva xizmat mashinasi bo‘la turib, 370 million so‘mga Trailblazer, shuningdek, pandemiya davrida Uchqo‘rg‘on, Pop, Qo‘shrabot va Narpay tumanlari hokimliklari ham Trailblazer sotib olgani to‘g‘risida xabar berilgandi. Denov tumani hokimligi esa karantin kuchaytirilgan paytda — 2020-yilning iyulida 398 million so‘mga Trailblazer LTZ-AT, Namangan viloyati hokimligi ham iyulda budjet mablag‘lari hisobidan 1 milliard 579 million so‘mga Toyota LC200 avtomobilini hamda sentabr oyida qariyb 400 million so‘mga Trailblazer LTZ-AT rusumli avtomobil xarid qilgan.

Bundan tashqari, Mirzacho‘l tumani hokimligi 370 million so‘mga Trailblazer, Qashqadaryo viloyati hokimligi hokim o‘rinbosariga 349 million so‘mga Equinox, hokimning xotin-qizlar masalalari bo‘yicha maslahatchisiga, yordamchisi hamda ichki ishlar boshqarmasi boshlig‘iga 621 million so‘mga 3 ta Tracker xizmat mashinalari sotib olgan.