ИИВ ЙҲХББ Фарғона вилоятида Lacetti русумли иккита транспорт воситасининг ҳайдовчилари йўл ҳаракати қоидаларини қўпол тарзда бузиб, ҳаракатланиб юргани акс этган видео юзасидан маълумот берди.
Ижтимоий тармоқларда қора рангли иккита Lacetti автомобили йўл қоидаларини бузиб, хавфли манёврларни бажарган ҳолда ҳаракатланаётгани тасвирланган видео тарқалди.
Маълум қилинишича, видеодаги ҳолат Фарғона вилояти ИИБ ЙҲХБ ходимлари томонидан ўрганиб чиқилган. Ўрганишлар давомида Lacetti’лардан бирини Қўқон шаҳрида яшовчи 24 ёшли Р.Р., иккинчисини эса 21 ёшли М.С. бошқаргани аниқланган.
Р.Р.га нисбатан Маъмурий жавобгарлик тўғрисидаги кодекснинг 126-модда (кўзгусимон ва (ёки) туси ўзгартирилган (қорайтирилган) ойнали, шунингдек, теварак-атрофни кўришни чеклайдиган қопламали транспорт воситаларидан фойдаланиш) 2-қисми, М.С.га нисбатан эса 128-5-модда (транспорт воситалари ҳайдовчиларининг халақит бериши ёки авария ҳолатини юзага келтириши, йўлнинг қарама-қарши ҳаракатланиш учун мўлжалланган томонига ёки бўлагига чиқиш) 2-қисми тартибида маъмурий баённома расмийлаштирилган.
Аввалроқ Тошкентда Spark ойнасидан танасини чиқариб, тик турган ҳолатда «съёмка» қилган шахс жавобгарликка тортилгани, Қўйлиқда Isuzu автобуси ва икки енгил автомобиль тўқнашгани тўғрисида хабар берилганди.
Изоҳ (0)