Facebook kompaniyasi kelasi hafta o‘z nomini o‘zgartirmoqchi, deb xabar beradi The Verge nashri vaziyatdan xabardor manbasiga tayanib.
Uning ma’lumotlariga ko‘ra, yangi nom Facebook ijtimoiy tarmog‘idan tashqari, Instagram, WhatsApp va Oculus servislariga egalik qiluvchi korporatsiyaning “metaolam” yaratishga intilishini o‘zida aks ettirishi kerak.
Facebook rahbari Mark Sukerberg rebrending haqida 28-oktabr kuni bo‘lib o‘tadigan Connect an’anaviy konferensiyasida batafsil gapirib beradi. Ammo yangi nom ertaroq ham e’lon qilinishi mumkin, dedi manba. Hozircha u qat’iy sir tutilmoqda, uni hatto korporatsiya oliy rahbariyati a’zolarining hammasi ham bilmaydi.
The Verge ma’lumotlariga ko‘ra, yangi nom Facebook’ning virtual ofislarda ishlash uchun mo‘ljallangan yangi Horiaon dasturi bilan qandaydir bog‘liq bo‘lishi mumkin.
Kompaniyaning o‘zida nomni o‘zgartirish ehtimoli haqidagi ma’lumotlar yuzasidan izoh berishgani yo‘q.
18-oktabr kuni Facebook kompaniyasi “metaolam” ishlab chiqish bo‘yicha loyiha doirasida Yevroittifoq mamlakatlarida 10 mingta ishchi o‘rin yaratmoqchi ekanini ma’lum qilgandi.
“RBK” eslatishicha, iyulda, The Verge podkastida nutq so‘zlar ekan, Sukerberg kelasi besh yil davomida kompaniya foydalanuvchilar ko‘z oldida o‘zgarmoqchi ekanini aytgandi. “Kompaniyamiz faoliyatining keyingi bosqichida biz foydalanuvchilar ko‘z o‘ngida ijtimoiy tarmoq kompaniyasi bo‘lishdan to‘xtab, metaolam kompaniyasi bo‘lishga o‘tamiz. Va, albatta, bizning bugun odamlar foydalanayotgan dasturlar doirasidagi barcha ishimiz hamjamiyat yaratish nuqtayi nazaridan ushbu tasavvur uyg‘onishiga bevosita imkoniyat yaratadi”, — degan edi u.
Izoh (0)