Rossiya bosh vaziri o‘rinbosari Tatyana Golikova 19-oktabr kuni Rossiyada 30-oktabrdan 7-noyabrgacha (4-noyabr kuni Xalq birligi kuni nishonlanadi, 5-noyabrdan 7-noyabrgacha shundoq ham dam olish kunlari edi) ishga chiqilmaydigan haftalik e’lon qilishni taklif etdi, deb yozadi Meduza. Koronavirus bilan kasallanish darajasi eng tez o‘sayotgan ba’zi hududlarda ishlanmaydigan kunlar 23-oktabrdanoq boshlanishi mumkin.
Oxirgi bir necha kundan buyon ko‘plab hududlarda, masalan, Sankt-Peterburgda ko‘rgazma va konsertlar, sportzallar, restoranlar va hatto savdo markazlariga kirish uchun QR-kodlar joriy qilinishi haqida e’lon qilindi. Shuningdek, butun Rossiya bo‘ylab, Stavropol o‘lkasi, Ingushetiya va Qalmog‘istondan tashqari, aholining ba’zi guruhlarini majburiy emlash joriy etilgan.
Majburiy vaksinatsiya Moskvada ham bor. Shaharda Ko‘p funksiyali markazlarda va savdo markazlarida COVID-19 ga ekspress-test tashkil qilingan, maktab o‘quvchilarini tekshirish boshlangan va metroda niqob taqish ustidan nazorat kuchaytirilgan.
25-oktabrdan shaharning 60 yoshdan oshgan aholisi, shuningdek, surunkali kasalliklari bo‘lgan moskvaliklar uy rejimiga yuborildi. Emlanganlar yoki so‘nggi yarim yil ichida koronavirusga chalinib o‘tganlar bunga rioya qilmasligi mumkin. Tashkilotlar o‘z xodimlarining 60 foizini, shu jumladan, 60 yoshdan oshgan va surunkali kasalliklari bo‘lgan barcha ishchilarini masofadan ishlashga o‘tkazish majburiyatini oldi. Choralar 2022-yil 25-fevralgacha amal qiladi.
Shunga qaramay, Meduza manbalariga ko‘ra, poytaxt hokimiyati hozircha QR-kodlarni qaytarmoqchi emas. COVID-19 ga qarshi kurash bo‘yicha federal tezkor shtabga yaqin manba so‘zlariga qaraganda, Moskva meriyasi umumiy ovqatlanish muassasalari uchun QR-kodlarni kiritishni istamayapti, chunki “restoratorlar noliydi”.
“Bizni majlisga chaqirib yig‘madi: cheklovlar yo‘q, cheklovlar bo‘yicha yig‘ilishlar ham yo‘q. Moskva cheklovlardan manfaatdor emas, u haligacha cheklovlardan jabr ko‘rgan biznesga katta-katta pullarni to‘lashda davom etmoqda. Hamma yangi cheklovlardan tiyilishga umid qilmoqda”, — dedi “Myaso & Riba” restoranlar tarmog‘i asoschisi, Moskva restoran biznesi ombudsmani Sergey Mironov.
Shahar rahbariyatiga yaqin bo‘lgan Meduza manbasi ma’lum qilishicha, hukumat fikricha, restoran va kafelarda QR-kodlar kiritilishi “vaksinatsiya sur’atlariga ta’sir qilmaydi, kasallanishlar zanjirini esa bu cheklov uza olmaydi”. 15-oktabr holatiga, meriya ma’lum qilganidek, Moskvada dekabr boshidan buyon besh milliondan ortiq odam emlangan, 279 ming kishi qayta emlangan (shahar aholisi 12,6 million kishini tashkil qiladi).
Umuman olganda, Meduza manbasiga ko‘ra, shaharda koronavirus bo‘yicha yangi holatlarning o‘sishi bilan bog‘liq vaziyat jiddiy xavotirlarga sabab bo‘lmayapti. “Hammasi zo‘r”, — dedi shahar rahbariyatiga yaqin bo‘lgan Meduza manbasi. Xususan, dedi u, 19-oktabr kuni Moskvada kunlik kasallanish darajasi 5,7 ming kishiga teng bo‘lgan (avvalgi to‘lqin avjiga chiqqan payt shaharda kuniga 8 mingdan ziyod odamda virus aniqlanardi).
Shu bilan birga, kasalxonaga yotqizish holatlari bo‘yicha 19-oktabr kuni Moskva 1,5 ming kishilik marradan o‘tdi; 639 kishi sun’iy nafas oldirish apparatiga ulangan holda bo‘lgan.
Moskvada COVID-19 bilan kasallanish holatlarining o‘sishiga hukumat, odatda, kasalxonalarda qo‘shimcha joylar yaratish bilan chora ko‘radi. Meduza ma’lumotlariga ko‘ra, 15-shahar kasalxonasining asosiy binosidan tashqari, tug‘ruq bo‘limida ham yaqinda koronavirus bemorlarini qabul qilish qayta boshlangan. Yana bir qator kasalxonalarda hamda “Krilatskoye” muz saroyida va “Moskva” avtomobil savdo markazida ham koronavirusga chalinganlar qabul qilinmoqda.
19-oktabr holatiga ko‘ra, COVID-bemorlar uchun mo‘ljallangan o‘rinlarning 70 foizi to‘lib bo‘lgan. Oktabr boshida Moskva meri Sergey Sobyanin koronavirus bemorlari uchun 12,5 mingta joy borligi, ularning 8 mingtasi bandligini ma’lum qilgandi.
Joriy hafta oxirigacha meriya qo‘shimcha koykalar yaratish haqida qaror qabul qilishi mumkin, bu, xususan, kunlik kasalxonaga yotqizish holatlari so‘nggi bir necha kundagi kabi yuqori darajada saqlanish-saqlanmasligiga bog‘liq bo‘ladi.
Izoh (0)