Facebook компанияси келаси ҳафта ўз номини ўзгартирмоқчи, деб хабар беради The Verge нашри вазиятдан хабардор манбасига таяниб.
Унинг маълумотларига кўра, янги ном Facebook ижтимоий тармоғидан ташқари, Instagram, WhatsApp ва Oculus сервисларига эгалик қилувчи корпорациянинг «метаолам» яратишга интилишини ўзида акс эттириши керак.
Facebook раҳбари Марк Цукерберг ребрендинг ҳақида 28 октябрь куни бўлиб ўтадиган Connect анъанавий конференциясида батафсил гапириб беради. Аммо янги ном эртароқ ҳам эълон қилиниши мумкин, деди манба. Ҳозирча у қатъий сир тутилмоқда, уни ҳатто корпорация олий раҳбарияти аъзоларининг ҳаммаси ҳам билмайди.
The Verge маълумотларига кўра, янги ном Facebook’нинг виртуал офисларда ишлаш учун мўлжалланган янги Horiaon дастури билан қандайдир боғлиқ бўлиши мумкин.
Компаниянинг ўзида номни ўзгартириш эҳтимоли ҳақидаги маълумотлар юзасидан изоҳ беришгани йўқ.
18 октябрь куни Facebook компанияси «метаолам» ишлаб чиқиш бўйича лойиҳа доирасида Евроиттифоқ мамлакатларида 10 мингта ишчи ўрин яратмоқчи эканини маълум қилганди.
«РБК» эслатишича, июлда, The Verge подкастида нутқ сўзлар экан, Цукерберг келаси беш йил давомида компания фойдаланувчилар кўз олдида ўзгармоқчи эканини айтганди. «Компаниямиз фаолиятининг кейинги босқичида биз фойдаланувчилар кўз ўнгида ижтимоий тармоқ компанияси бўлишдан тўхтаб, метаолам компанияси бўлишга ўтамиз. Ва, албатта, бизнинг бугун одамлар фойдаланаётган дастурлар доирасидаги барча ишимиз ҳамжамият яратиш нуқтаи назаридан ушбу тасаввур уйғонишига бевосита имконият яратади», — деган эди у.
Изоҳ (0)