Ижтимоий тармоқларда Бобур Ғаниев номи билан танилган блогер Жиноят ишлари бўйича Учтепа туман суди қарорига кўра, 15 суткага қамалгани тўғрисида хабар берилганди. 17 октябрь куни Бобур Ғаниев видеомурожаат билан чиқиб, бизнес билан шуғулланаётгани сабаб энди YouTube’даги каналини юритишга вақти бўлмаслигини маълум қилди.
«Ҳурматли юртдошлар, мен бир бизнес бошладим. Ўша бизнесимни юритишим учун YouTube’да ўз фаолиятимни олиб боришга энди вақтим бўлмайди… Мени тўғри тушунасизлар деган умиддаман», — дейди автоблогер.
Ғаниев ўзининг мақсади қонунийликни тарғиб қилиш бўлганини таъкидлаб, 30 сентябрдан 17 октябргача устида бўлган кийимларни ёқиб юборган. У ўзининг бундан ҳаракатини «эски, негатив хотираларни йўқ қилиш мақсадида», дея изоҳлаган.
Эслатиб ўтамиз, 30 сентябрь куни Учтепа тумани «Фарҳод» бозори рўпарасида ўтказилаётган «Хавфсиз пойтахт» профилактик тадбири давомида Тошкент шаҳар ИИББ ЙҲХБ ЙПХ инспекторлари томонидан Epica русумли автомашина тўхтатилган.
Транспорт воситаси ҳайдовчиси 1993 йилда туғилган Аброр Козубаевнинг ҳужжатлари текширилган. Шу жараёнда Epica русумли автомашинада йўловчи сифатида ўтирган 1987 йилда туғилган Бобур Ғаниев (интернетда ЙПХ ходимларини танқид қилган видеолари билан танилган) ЙПХ инспекторларини ҳақорат қилиб, жанжал кўтарган. ИИО ходимларининг қонуний талабларига бўйсунмасдан жамоат тартибини бузган.
Шундан сўнг транспорт воситасининг ҳайдовчиси, йўловчилари Бобур Ғаниев ва Обит Салимов Учтепа тумани ИИО ФМБга олиб борилган. Ҳолат юзасидан ҳужжатларни расмийлаштириш ва текширув ўтказиш жараёнида Бобур Ғаниевнинг шахсий уяли телефон аппаратида порнографик мазмундаги, қонунда тақиқланган видеоматериаллар ва фотосуратлар борлиги аниқланган.
Юз берган ҳолат бўйича тўпланган ҳужжатлар Жиноят ишлари бўйича Учтепа туман судига тақдим этилган. Унга кўра, Бобур Ғаниев Маъмурий жавобгарлик тўғрисидаги кодекснинг 41-моддасида кўрсатилган ҳуқуқбузарликни содир этгани учун (ҳақорат қилиш) БҲМнинг 20 баробари (5,4 миллион сўм), 194-модда (ички ишлар органлари ходимининг қонуний талабларини бажармаслик) бўйича БҲМнинг 1 баравари (270 минг сўм), 195-модда (ички ишлар органлари ходимларининг ўз хизмат бурчларини бажаришларига қаршилик кўрсатиш) бўйича эса 15 сутка маъмурий қамоқ жазоси белгиланган.
Изоҳ (0)