Samarqandda bog‘cha bolalariga ajratilgan qariyb 5 kg go‘shtni olib chiqib ketmoqchi bo‘lgan xo‘jalik mudirasi va bosh oshpaz ishdan olindi

Qayd etilishicha, bog‘cha bosh oshpazi pishirilgan 4,7 kilogramm go‘shtni kirxonaga bekitgan. Shundan so‘ng kirxona derazasidan go‘shtni xo‘jalik mudirasiga bergan. Xo‘jalik mudirasi esa mahsulotni bog‘chadan olib chiqib ketayotganda tarbiyachilar N.N. va M.U. tomonidan to‘xtatib qolingan.

Ushbu holat bo‘yicha oshpaz va xo‘jalik mudirasi bilan suhbat o‘tkazilganda bu ishni bog‘cha direktori Sh.U.ning topshirig‘i bilan qilganini aytgan. Shuningdek, ular aytgan gaplari haqiqat bo‘lib, audio-videolardagi yozuvlar to‘g‘ri ekanini yozma bayonotda ham tasdiqlagan.

Ma’lum qilinishicha, voqeadan so‘ng bosh oshpaz O‘.A. va xo‘jalik mudirasi M.E. bilan tuzilgan mehnat shartnomasi bekor qilingan. Shu bilan birga, mazkur holat yuzasidan huquqni muhofaza qiluvchi tashkilotlar tomonidan qonun doirasida tegishli choralar ko‘rilishi ma’lum qilingan.