Air India aviakompaniyasiga tegishli Boeing 787-8 Dreamliner samolyoti uchib ko‘tarilgandan so‘ng dvigatellarga yoqilg‘i uzatilishi to‘xtatilishi oqibatida halokatga uchragan. Bu haqda Hindiston aviatsiya halokatlarini tekshirish byurosining dastlabki tergov hisobotida ma’lum qilindi.
Hisobotga ko‘ra, samolyot uchib ko‘tarilganidan so‘ng dvigatellarga yoqilg‘i uzatilishi to‘xtagan, bu esa uchuvchilar kabinasida chalkashlikka sabab bo‘lgan. Ta’kidlanishicha, samolyot maksimal tezlikka erishgach, 1 va 2-dvigatellarga yoqilg‘i uzatilishi to‘xtagan.
“Kabinadagi suhbatlar yozuvida uchuvchilardan biri ikkinchisidan nima uchun o‘chirib qo‘yganini so‘rayotgani eshitiladi. Ikkinchi uchuvchi esa bunday qilmaganini aytgan”, deya qayd etilgan hisobotda.
Yuzaga kelgan chalkashlikdan bir necha daqiqa o‘tgach, samolyot qulab tushgan.
Shu bilan birga, mutaxassislar uchuvchilar dvigatellardan birini ishga tushira olganini aniqlashgan. Ammo bu layner tezligining keskin pasayishini to‘xtatishga yordam bermagan. Shuningdek, hisobotda aytilishicha, Boeing parvozi hududida dvigatelga kirib, halokatga sabab bo‘lishi mumkin bo‘lgan qushlar kuzatilmagan.
Hindistondan Buyuk Britaniyaga yo‘l olgan Boeing 787 Dreamliner yo‘lovchi samolyoti 12-iyun kuni Ahmadobod shahri yaqinida uchib ko‘tarilganidan bir necha daqiqa o‘tib halokatga uchragan. Layner shifokorlar yotoqxonasiga qulab tushgan. Parvozni amalga oshirgan Air India aviakompaniyasi ma’lumotlariga ko‘ra, samolyot bortida 242 kishi bo‘lgan.
Faqat bitta yo‘lovchi omon qolgan. Keyinchalik erkakning aytishicha, samolyot havoga ko‘tarilganidan so‘ng “go‘yo havoda to‘xtab qolgandek bo‘lgan”, so‘ngra tibbiyot kolleji yotoqxonasiga qulab tushgan. So‘nggi ma’lumotlarga ko‘ra, qutqaruvchilar tomonidan topilgan aviahalokat qurbonlarining umumiy soni 275 kishini tashkil etdi.
Izoh (0)