Bugun, 12-iyul kuni Toshkent shahrida uy hovuzida yetti bola cho‘kkani va ulardan ikki nafari vafot etgani haqida xabarlar tarqaldi. Bosh prokuratura holat yuzasidan rasmiy axborot berib, aslida bir bola halok bo‘lganini maʼlum qildi.
Bosh prokuraturaga ko‘ra, Respublika shoshilinch tibbiy yordam markaziga 2025-yil 12-maydan 10-iyulgacha Toshkentning turli hududlaridan yetti nafar bola cho‘kishi bilan bog‘liq murojaatlar kelib tushgan.
Bolalardan to‘rt nafari sog‘ayib, uyiga javob berilgan. Ikki nafari hozircha shifoxonada, ulardan biri og‘ir ahvolda. Bir nafar bola esa vafot etgan. Maʼlum qilinishicha, halok bo‘lgan bola qarovsiz qolib, xonadondagi basseynga tushib ketgan. U shifoxonaga yetkazilganda, biologik o‘lim holati qayd etilgan.
Hozirda holat yuzasidan Chilonzor tumani prokuraturasi tomonidan tergovga qadar tekshiruv harakatlari olib borilmoqda.
Avvalroq may oyida Samarqand viloyati Paxtachi tumanida ikki nafar o‘quvchi hovuzda cho‘kib, halok bo‘lgani xabar qilingandi. Yana bir holat Farg‘onada yuz begandi — uch nafar voyaga yetmagan bola sun’iy suv havzasiga cho‘kib ketgan.
Shu bilan birga, Toshkentdagi Bo‘rijar kanaliga tushib ketgan qizni qutqargan erkakning o‘zi halok bo‘lgandi. Andijon viloyatining Oltinko‘l tumanida sakkiz yoshli ikki bola hovuzda cho‘kib, vafot etgandi.
Izoh (0)