O‘zbekistonda 2021-yil yanvar—sentabr oylari yakunlariga ko‘ra, 5 mingga yaqin fuqaro giyohvandlikka qaram kishilar hisobida turibdi. Bu haqda Sog‘liqni saqlash vazirligi bosh narkologi, Respublika ixtisoslashtirilgan narkologiya ilmiy-amaliy tibbiyot markazi direktori, tibbiyot fanlari doktori Zarifjon Ashurovga tayanib, vazirlik matbuot xizmati xabar berdi.
Ashurovning so‘zlariga ko‘ra, giyohvandlikka qaram kishilar hisobida turgan fuqarolarning 31 foizini 20-40 yoshdagilar tashkil etadi. Bundan tashqari, ularning 1,8 foizida OIV infeksiyasi aniqlangan.
“Ushbu global xavf ko‘lami kengayishi unga qarshi kurash samaradorligini oshirishni taqozo etyapti. Shu maqsadda yaqinda hamdo‘stlik davlatlarining narkologiya sohasida faoliyat olib boruvchi yetakchi mutaxassislari Rossiya poytaxtida to‘planishdi. Biz ham O‘zbekiston delegatsiyasi tarkibida ana shu tadbirda qatnashdik.
Tashrifimiz doirasida xorijlik hamkasblarimiz bilan fikr va tajriba almashdik. Yakunda narkologiya markazimiz bilan Moskva shahri narkologiya ilmiy-amaliy markazi hamda Boshqirdiston Respublikasi Sog‘liqni saqlash vazirligining 2-sonli narkologiya dispanseri o‘rtasida memorandum, V.P. Serbskiy nomidagi narkologiya va psixiatriya Milliy tibbiy tadqiqot markazi bilan esa kelishuv loyihasi imzolandi”, — deydi u.
BMTning Narkotiklar va jinoyatchilikni nazorat qilish boshqarmasi ma’lumotlariga ko‘ra, hozirgi kunda dunyo aholisining 31 milliondan ortig‘i giyohvand moddalar iste’moli tufayli jiddiy kasalliklardan aziyat chekadi va ularning aksariyati yoshlar. Ta’kidlanishicha, Yer yuzidagi barcha o‘limlar ko‘rsatkichining 23 foizidan ortig‘i narkotiklar iste’moli bilan bog‘liq.
Avvalroq Toshkentda narkolaboratoriya tashkil qilgan 18 yoshli yigit ushlangani to‘g‘risida xabar berilgandi.
Izoh (0)