Грузияда ҳибсда сақланаётган мамлакат собиқ президенти Михаил Саакашвилининг соғлиғи ёмонлашди. Қамоқхонада у очлик эълон қилганди, шу сабабли унинг оёқлари шишиб кетган. Бу ҳақда Грузия собиқ раҳбарининг адвокати Георгий Гелхаури 12 октябрь куни мижози билан учрашгандан кейин журналистларга маълум қилди.
«У (Саакашвили) бизга хабар қилгани каби унинг оёқлари шишиб кетган. Ҳаракатланишда ҳам қийинчиликка дуч келмоқда. Шу сабабли, унга шифокор назорати остида бўлиш ниҳоятда зарур. Бу ҳолатда мен унинг шахсий шифокорини назарда тутяпман. Шахсий шифокори унинг аҳволи ҳақида бизга маълум қилиши керак. Миша (Саакашвили) шахсий шифокори ҳар куни унинг олдига ташриф буюришини талаб қилмоқда», — деди Гелхаури.
Саакашвилининг шахсий шифокори Николоз Кипшидзе 10 октябрь куни собиқ президентнинг соғлиғи ёмонлашгани ва уни касалхонага ётқизиш кераклигини айтганди. Кейинчалик Адлия вазирлигининг Махсус жазони ижро этиш хизмати Грузия собиқ раҳбарининг аҳволи қониқарли, ҳаётий белгилари нормал экани ҳақида баёнот тарқатди.
Аввалроқ Саакашвили омма олдида гиёҳвандликка тест топширишга тайёрлиги, шу орқали у бош вазир Иракли Гарибашвилининг Саакашвили гиёҳванд экани ҳақидаги тахминларини йўққа чиқармоқчи экани ҳақида хабар қилинганди. 6 октябрь куни Гарибашвили Саакашвилининг гиёҳванд моддаларни истеъмол қилиши мумкинлиги ҳақида очиқ мактуб эълон қилган.
Саакашвили 1 октябрь куни Тбилисида ҳибсга олинганди. У ҳозир Рустави шаҳридаги қамоқхонада. Илгари Грузияда унга нисбатан тўртта жиноий иш очилган, улардан иккитаси бўйича 2018 йилда суд ҳукми ҳам ўқилган. Саакашвили келганидан сўнг Грузия Ички ишлар вазирлиги унга қарши чегарани ноқонуний кесиб ўтиш бўйича яна бир жиноий иш очган.
Изоҳ (0)