Sotheby’s auksion uyi XVII—XVIII asrlarda Boburiylar davriga tegishli olmos va zumrad linzalari o‘rnatilgan bir juft ko‘zoynak sotuvga qo‘yildi, deb xabar beradi Esquire.
Ko‘zoynaklardan biriga o‘rnatilgan olmos linzalar 200 qirotli yaxlit qimmatbaho toshdan tayyorlangan. Ikkinchisi esa 300 qirotli yaxlit zumraddan ishlangan. Linzalar ko‘zoynak gardishiga taxminan 1890-yilda joylashtirilgan.
Ko‘zoynaklarning biri 1,5—2,5 million funtga baholanmoqda. 27-oktabr kuni, auksion oldidan ular Gonkong va Londondagi ko‘rgazmalarda namoyish etiladi.
Sotheby’s mutaxassislarining ta’kidlashicha, oldinlari odamlar qimmatbaho toshli linzalar “ruhiy barkamollikka erishishga ko‘maklashadi” deb hisoblagan: brilliantlar “aqlni ravshanlashtiradi”, zumradlar “davolash xususiyatiga hamda mo‘jizaviy kuchga ega va yovuzlikni qaytaradi”.
Zumrad linzali ko‘zoynaklar Katta Piliniyning qadimgi Rim haqidagi “Tabiiy tarix” kitobida ham keltirilgan. Uning yozishicha, imperator Neron ko‘zoynaklar orqali gladiatorlar jangini kuzatgan.
Avvalroq Chanel ko‘rinishi flakonni esga soladigan 55,55 qirotli marjon ishlab chiqargani, Dior brendi atirgullardan ilhomlanib yaratilgan yangi taqinchoqlar kolleksiyasini taqdim etgani to‘g‘risida xabar berilgandi.
Izoh (0)