Shavkat Mirziyoyev Guliston shahrining “Yangi hayot” mahallasida bo‘ldi. Bu haqda Prezident matbuot xizmati xabar qildi.
Ma’lum qilinishicha, bu yerda 2019—2020-yillarda 14 ta ko‘p qavatli uy qurilgan. Bugungi kunda yana 7 ta 9 qavatli uy qurilishi boshlangan. Ulardagi 504 ta xonadondan 100 tasi kam ta’minlangan oilalarga imtiyozli ravishda beriladi. Yoshlar mehnat guzari, stadion, bolalar maydonchalari quriladi.
Prezident yangi mavzeda xizmatlarni ko‘paytirish, tadbirkorlik subyektlari tashkil etib, bu yerda yashovchilarni ish bilan ta’minlash muhimligini ta’kidladi.
“Kambag‘allikni qisqartirishning eng asosiy omillari boshpana va ish joyi. Bu maqsadlar uchun katta imkoniyatlar berilyapti. Bu yildan boshlab ipoteka krediti bo‘yicha moliyaviy resurslardan yetishmovchilik va cheklovlar bo‘lmaydi, deb e’lon qilganmiz. Shundan foydalanib, tadbirkorlar ishtirokida ko‘p uylar qurish mumkin”, — dedi Shavkat Mirziyoyev.
Shu yerda mahalla nuroniylari bilan samimiy muloqot bo‘ldi.
“Bir paytlar Sirdaryo viloyati faqat qishloq xo‘jaligiga ixtisoslashgan edi. Oxirgi yillarda zamonaviy sanoat kirib kelyapti. Mana shunday uylar qurilyapti. Nima uchun? Odamlarda xarid qobiliyati bor. Endi bu ishlarni to‘xtatmasligimiz kerak. Chunki yoshlarimiz yetishib kelyapti, xalqimizning talabi o‘sib boryapti. Davlatimiz shunga munosib sharoit yaratishi kerak”, — dedi Prezident.
Nuroniylar viloyatda ro‘y berayotgan o‘zgarishlar, yoshlar tarbiyasi haqida o‘z fikrlarini bildirdi.
Bundan avval Shavkat Mirziyoyev Sirdaryodagi xonadonlarning birida mehmon bo‘lgani, Gulistonning eski dehqon bozori o‘rnida Guliston City qurishni taklif qilgani hamda Sirdaryo Mega Luks qo‘shma korxonasi faoliyati bilan tanishgani haqida xabar berilgandi.
Izoh (0)