Шавкат Мирзиёев Гулистон шаҳрининг «Янги ҳаёт» маҳалласида бўлди.
Маълум қилинишича, бу ерда 2019—2020 йилларда 14 та кўп қаватли уй қурилган. Бугунги кунда яна 7 та 9 қаватли уй қурилиши бошланган. Улардаги 504 та хонадондан 100 таси кам таъминланган оилаларга имтиёзли равишда берилади. Ёшлар меҳнат гузари, стадион, болалар майдончалари қурилади.
Президент янги мавзеда хизматларни кўпайтириш, тадбиркорлик субъектлари ташкил этиб, бу ерда яшовчиларни иш билан таъминлаш муҳимлигини таъкидлади.
«Камбағалликни қисқартиришнинг энг асосий омиллари бошпана ва иш жойи. Бу мақсадлар учун катта имкониятлар бериляпти. Бу йилдан бошлаб ипотека кредити бўйича молиявий ресурслардан етишмовчилик ва чекловлар бўлмайди, деб эълон қилганмиз. Шундан фойдаланиб, тадбиркорлар иштирокида кўп уйлар қуриш мумкин», — деди Шавкат Мирзиёев.
Шу ерда маҳалла нуронийлари билан самимий мулоқот бўлди.
«Бир пайтлар Сирдарё вилояти фақат қишлоқ хўжалигига ихтисослашган эди. Охирги йилларда замонавий саноат кириб келяпти. Мана шундай уйлар қуриляпти. Нима учун? Одамларда харид қобилияти бор. Энди бу ишларни тўхтатмаслигимиз керак. Чунки ёшларимиз етишиб келяпти, халқимизнинг талаби ўсиб боряпти. Давлатимиз шунга муносиб шароит яратиши керак», — деди Президент.
Нуронийлар вилоятда рўй бераётган ўзгаришлар, ёшлар тарбияси ҳақида ўз фикрларини билдирди.
Бундан аввал Шавкат Мирзиёев Сирдарёдаги хонадонларнинг бирида меҳмон бўлгани, Гулистоннинг эски деҳқон бозори ўрнида Guliston City қуришни таклиф қилгани ҳамда Sirdaryo Mega Luks қўшма корхонаси фаолияти билан танишгани ҳақида хабар берилганди.
Изоҳ (0)