Gruziya sobiq prezidenti Mixail Saakashvili omma oldida giyohvandlikka test topshirishga tayyor, shu orqali u bosh vazir Irakli Garibashvilining Saakashvili giyohvand ekani haqidagi taxminlarini yo‘qqa chiqarmoqchi. Bu haqda hibsdagi sobiq prezidentning advokati Beka Basilaya jurnalistlarga ma’lum qildi.
“Biz Vena shahrida emas, Samxarauli klinikasida (Gruziya sud-tibbiy ekspertiza byurosi) televizion kameralar ostida o‘pkadan tortib kimyoviy tekshiruvgacha bo‘lgan har qanday giyohvandlik testidan o‘tishga tayyormiz. Shu bilan birga, biz Garibashvilini ham byuro binosida test topshirishga chaqiramiz, o‘shanda ko‘ramiz, bu g‘iybatchi nima derkan”, — dedi Basilaya qamoqdagi Saakashvilining yoniga tashrifidan so‘ng.
6-oktabr kuni Garibashvili Saakashvilining giyohvand moddalarni iste’mol qilishi mumkinligi haqida ochiq maktub e’lon qilgandi.
Saakashvili 1-oktabr kuni Tbilisida hibsga olingandi. U hozir Rustavi shahridagi qamoqxonada. Ilgari Gruziyada unga nisbatan to‘rtta jinoiy ish ochilgan, ulardan ikkitasi bo‘yicha 2018-yilda sud hukmi ham o‘qilgan. Saakashvili kelganidan so‘ng, Gruziya Ichki ishlar vazirligi unga qarshi chegarani noqonuniy kesib o‘tish bo‘yicha yana bir jinoiy ish ochgan.
Ukraina prezidenti Vladimir Zelenskiy mamlakat rasmiylari Saakashvilini Ukrainaga qaytarish uchun bor imkoniyatini ishga solishini aytgandi, chunki u Ukraina fuqaroligiga ega. Biroq Gruziya Saakashvilini Ukrainaga topshirmasligini ma’lum qildi.
Keyinroq Saakashvilining Facebook sahifasida Ukraina prezidenti Vladimir Zelenskiyga atab uch tilda yozilgan post paydo bo‘ldi. Unda Saakashvili o‘zini Rossiya prezidenti Vladimir Putinning “shaxsiy asiri” deb atagan, hibsga olinishini esa qonunga xilof deb hisoblagan. Shuningdek, u Zelenskiyga qo‘llab-quvvatlagani uchun minnatdorlik bildirgan.
AQSh Gruziya hukumatini hibsdagi Saakashviliga nisbatan adolatli munosabatda bo‘lishga chaqirdi.
Izoh (0)