O‘zbekiston triatlon federatsiyasi 7SABER sport kiyimlari brendi ko‘magida Asian Sprint Triathlon Cup musobaqasini o‘tkazmoqda. 9—10-oktabr kunlari “O‘zekspomarkaz” MKK AJ hududida 30 mamlakatdan kelgan 300 dan ortiq triatlonchilar o‘rtasida eng kuchli sprinterlar aniqlanadi.
Osiyo Olimpiya kengashi vitse-prezidenti Otabek Umarov voqea haqida shunday fikr bildirdi: “Bu yil milliy triatlon uchun haqiqiy ilg‘or yil bo‘ldi, u bir-ikki yil ichida katta masofani bosib o‘tdi. Afsonaviy Ironman Lanzarote doirasida, iyul oyida bo‘lib o‘tgan Jahon chempionatida sportchilarimizning aqlbovar qilmas muvaffaqiyati ko‘plab yigit-qizlarni ilhomlantirdi. Ishonamanki, bo‘lajak musobaqa bu go‘zal sport turini rivojlantirishga yanada katta hissa qo‘shadi. Barcha ishtirokchilarga muvaffaqiyat tilayman”.
Musobaqa reglamentida quyidagi toifadagi sportchilar ishtirok etishi ko‘zda tutilgan: professionallar Elite (23 yoshdan katta bo‘lganlar) va U-15 (12—15), shuningdek, havaskor (18—24, 25—29, 30—34, 35—39, 40—44, 45—49, 50—54, 55—59, 60 va undan katta bo‘lganlar).
“Shunisi e’tiborliki, Osiyo Kubogi bizning holatimizda faqat Osiyo mamlakatlari o‘rtasidagi musobaqani anglatmaydi. Bu ochiq qit’alararo musobaqa bo‘lib, unda Avstriya, Lyuksemburg, Polsha, Rossiya, Slovakiya, Chexiya va Shveytsariya kabi mamlakatlardan sportchilar o‘z ishtiroklarini tasdiqlab o‘tishdi. Bundan tashqari, Elite toifasi eng kuchli triatlonchilarning ishtirokini nazarda tutadi, bundan kelib chiqib aytish mumkinki, yaqinlashib kelayotgan Toshkentdagi musobaqa starti imkon qadar ajoyib bo‘lishi kutilmoqda”, — deya ta’kidlab o‘tdi triatlon federatsiyasi Raisi Viktor Vladimirovich Mahmudov.
9-oktabr kuni professionallar Asian Sprint Triathlon Cup’da bellashishadi, ertasi kuni esa 150 ga yaqin havaskorlar o‘z kuchlarini sinab ko‘rishlari mumkin bo‘ladi. Ikkita distansiya belgilangan: 15 yoshdan oshgan sportchilar uchun (suzish 750 metr, velosipedda bellashuv 20 kilometr, yugurish 5 kilometr) va 12—15 yoshli o‘smirlar uchun (suzish 300 metr, velosipedda bellashuv 8 kilometr, yugurishda 2 kilometr).
Ta’kidlash joizki, xorijiy texnik vakillar va xalqaro hakamlar ko‘magida xalqaro standartlar bo‘yicha Asian Sprint Triathlon Cup ochiq musobaqasi O‘zbekistonda ilk bor o‘tkaziladi.
Musobaqa 9—10-oktabr kunlari soat 09:00 da boshlanadi.
Tomoshabinlar va muxlislar uchun kirish bepul.
Sayt: http://triathlon.uz/
Instagram: https://www.instagram.com/triathlonuz
Facebook: https://www.facebook.com/triathlonuz
YouTube: https://www.youtube.com/channel/UCj4RJwu3P3-cAPc51Ahyw4Q
Telegram kanali: https://t.me/triathlonuz
Telegram’dagi chat: https://t.me/triathlonchat
Reklama huquqi asosida.
Izoh (0)