Afg‘onistonda “Tolibon”ning 34 a’zosi davlat lavozimlariga tayinlandi

Afg‘onistonda muvaqqat hukumat tuzgan “Tolibon” harakatning 34 a’zosini davlat lavozimlariga, jumladan, bir kishini vazirlikka tayinladi. Tegishli qaror harakat vakili, axborot va madaniyat vaziri o‘rinbosari Zabihulla Mujohidning Twitter’dagi sahifasida e’lon qilingan, deb yozadi “TASS”.

Hujjatga ko‘ra, tasdiqlangan har bir lavozimga “Tolibon”ning faqat diniy unvonga ega vakillari tayinlangan: to‘rt nafar qori, 16 mulla va 14 mavlaviy (maxsus diniy ta’lim olgan mullalar).

Xususan, mulla Abdumajid Oxund shahidlar va nogironlar masalalari bo‘yicha vazir lavozimini egalladi va shu tariqa sentabr oyida tuzilgan muvaqqat hukumatning 23-a’zosiga aylandi. Mavlavi Abdukabir bosh vazirning siyosiy masalalar bo‘yicha o‘rinbosari etib tayinlandi. Mavlaviy Mati ul-Haqq Afg‘oniston Qizil Yarim Oy jamiyati rahbari bo‘ldi, harakatning asoschilaridan biri, yaqinda mamlakatda ommaviy qatl qilish amaliyoti qayta tiklanganini e’lon qilgan mulla Nuruddin Turobiy esa uning o‘rinbosari bo‘ldi.

Qolgan toliblar asosan viloyat ma’muriyatlari rahbarlari yoki ularning o‘rinbosarlari lavozimlariga tayinlangan. Qaror “Tolibon” oliy rahbari Mavlavi Haybatulla Oxundzoda tomonidan ma’qullangan.

Mahalliy matbuot qayd etishicha, yangi tayinlangan 34 amaldorning deyarli hammasi pushtunlar, ya’ni Afg‘onistondagi eng katta etnik guruh vakillaridir.

Avvalroq “Tolibon” Afg‘onistonda Ayollar masalalari bo‘yicha vazirlikni tugatib, uning o‘rniga Saxovatni targ‘ib qilish va illatlarni yo‘qotish vazirligini tuzgandi.