Vashington Gruziya hukumatini mamlakatda hibsga olingan sobiq prezident Mixail Saakashviliga nisbatan adolatli munosabat ko‘rsatishga chaqirmoqda va vaziyatni diqqat bilan kuzatmoqda. Bu haqda AQSh Davlat departamenti matbuot kotibi Ned Praysga tayanib, “Interfaks” xabar berdi.
“Biz Gruziya rasmiylarini Saakashviliga nisbatan Gruziya qonunlari hamda inson huquqlari bo‘yicha Gruziyaning xalqaro majburiyatlariga muvofiq adolatli munosabatda bo‘lishni ta’minlashga chaqiramiz”, — dedi Prays.
Saakashvili 1-oktabr kuni Tbilisida hibsga olingandi. U hozir Rustavi shahridagi qamoqxonada. Gruziyada Saakashvili bir nechta jinoiy ishlarda ishtirok etmoqda. Gruziya hukumati vakillari Saakashvili chegarani kesib o‘tishi bilan hibsga olinishi haqida bir necha bor ogohlantirgan.
Hibsga olingandan so‘ng, Saakashvili ochlik e’lon qildi va qanday shart bo‘lmasin uni tugatish niyati yo‘qligini bildirdi.
Avvalroq Ukraina prezidenti Vladimir Zelenskiy mamlakat rasmiylari Saakashvilini Ukrainaga qaytarish uchun bor imkoniyatini ishga solishini aytgandi, chunki u Ukraina fuqaroligiga ega. Ammo Gruziya Saakashvilini Ukrainaga topshirmasligini ma’lum qildi.
Mixail Saakashvili 2008—2013-yillarda Gruziya prezidenti bo‘lgan. U prezidentlik muddati tugashiga oz qolgan vaqtda mamlakatdan chiqib ketgan. Shundan keyin unga nisbatan to‘rtta jinoiy ish ochilgan, ulardan ikkitasi bo‘yicha 2018-yilda sud hukmi ham o‘qilgan.
Izoh (0)