Chirchiq daryosi bo‘ylab yangi ko‘prik quriladi

Toshkent viloyatida Chirchiq daryosi ustidan o‘tuvchi yangi ko‘prikni qurish ishlari boshlandi, deb xabar beradi viloyat hokimligi axborot xizmati.

Ma’lum qilinishicha, u Chirchiq shahriga olib kiruvchi 4R12 magistral yo‘li orqali Chirchiq daryosi ustidan o‘tuvchi ko‘prik inshootini o‘z ichiga oladi. Hozirda tor yo‘l to‘g‘on bo‘ylab o‘tgan.

Noyob deya ta’riflanayotgan mazkur loyiha Transport vazirligi, “O‘zbekiston temiryo‘llari” AJ va Toshkent viloyati hokimligi tomonidan ishlab chiqilgan.

E’lon qilingan eskizlarga ko‘ra, loyihada Toshkentdan ko‘prik tomon yo‘nalishda yerosti yo‘l o‘tkazgichi qurilishi ko‘zda tutilgan.

Qurilish boshlanadigan nuqtada Chirchiq shahar hokimi Sanjar Yusupov boshchiligida “O‘zbekiston temiryo‘llari” AJ bosh muhandisi Zafar Mahkamov, hududiy sektor rahbarlari, mahalliy kengash deputatlari hamda faollar ishtirokida Qur’on tilovat qilingan.

Ta’kidlanishicha, loyiha Prezident Shavkat Mirziyoyevga mart oyida Chirchiqqa amalga oshirgan tashrifi davomida taqdim etilgan.