Тошкент вилоятида Чирчиқ дарёси устидан ўтувчи янги кўприкни қуриш ишлари бошланди, деб хабар беради вилоят ҳокимлиги ахборот хизмати.
Маълум қилинишича, у Чирчиқ шаҳрига олиб кирувчи 4Р12 магистрал йўли орқали Чирчиқ дарёси устидан ўтувчи кўприк иншоотини ўз ичига олади. Ҳозирда тор йўл тўғон бўйлаб ўтган.
Ноёб дея таърифланаётган мазкур лойиҳа Транспорт вазирлиги, «Ўзбекистон темир йўллари» АЖ ва Тошкент вилояти ҳокимлиги томонидан ишлаб чиқилган.
Эълон қилинган эскизларга кўра, лойиҳада Тошкентдан кўприк томон йўналишда ерости йўл ўтказгичи қурилиши кўзда тутилган.
Қурилиш бошланадиган нуқтада Чирчиқ шаҳар ҳокими Санжар Юсупов бошчилигида «Ўзбекистон темир йўллари» АЖ бош муҳандиси Зафар Маҳкамов, ҳудудий сектор раҳбарлари, маҳаллий кенгаш депутатлари ҳамда фаоллар иштирокида Қуръон тиловат қилинган.
Таъкидланишича, лойиҳа Президент Шавкат Мирзиёевга март ойида Чирчиққа амалга оширган ташрифи давомида тақдим этилган.
Изоҳ (0)