Канада ва Британия олимлари гуруҳи томонидан ўтказилган тадқиқотларга кўра, иқлим ўзгаришлари сабаб Ер 500 йилдан сўнг яшаш учун яроқсиз ҳолга келиб қолади. Мазкур тадқиқот натижалари Global Change Biology илмий журналида эълон қилинган, деб хабар беради «Korrespondent.net».
Экспертлар сайёранинг ўзгаришига оид учта моделни тақдим этган. Энг ёмон сценарийга кўра, инсон тур сифатида йўқолиб кетади.
Уларнинг сўзларига кўра, бу Ернинг бир қисми исиш сабаб яшаш учун яроқсиз ҳолга келганида, қишлоқ хўжалигининг қатор қисми, хусусан, буғдой ва картошка унумдор ерлар етишмаслиги оқибатида тақчил бўла бошлагач содир бўлади.
«Агар глобал исиш тўхтатилмаса, 500 йилдан сўнг Ер шу қадар ўзгариб кетадики, биз омон қолиш ва тарихий ҳамда географик жиҳатдан илдиз отган маданиятларимизни сақлаб қолиш учун курашишга мажбур бўламиз», — дейилади мақолада.
Шу муносабат билан олимлар жаҳон ҳамжамиятини фалокатнинг олдини олиш мақсадида иқлим ўзгаришига қарши курашишга чақирмоқда.
Аввалроқ Бирлашган Миллатлар Ташкилотининг Иқлим ўзгариши бўйича ҳукуматлараро гуруҳи кўплаб иқлим ўзгаришлари доимий бўлиб қолиши ҳақида огоҳлантирувчи ҳисобот эълон қилган эди. Ҳисоботга кўра, «кузатилган кўплаб иқлим ўзгаришлари минглаб, ҳатто юз минг йиллар давомида мисли кўрилмаган даражада», бошланган кўплаб ўзгаришларни эса масалан, денгиз сатҳининг кўтарилишини, «юз минг йиллар давомида қайтариб бўлмайди».
Шунингдек, олимлар Арктикада ҳаво ҳарорати сайёранинг бошқа минтақаларига қараганда тезроқ қизиётганини маълум қилганди. Бу жараён эса сайёрадаги об-ҳаво учун салбий оқибатларга олиб келиши мумкин.
Изоҳ (0)