Toshkent viloyatidagi dehqon bozorida iste’molga yaroqsiz 140 kg go‘sht va 30 litr sut yo‘q qilindi

Toshkent viloyati IIBB PPX va JTSB Karantin tadbirlarini ta’minlash guruhi xodimlari tomonidan viloyatning Yangiyo‘l shahri markazida joylashgan dehqon bozorida o‘tkazilgan nazorat tadbirlari davomida iste’molga yaroqsiz 140 kilogramm go‘sht va 30 litr sut yo‘q qilindi. Bu haqda viloyat IIBB matbuot xizmati xabar berdi.

O‘tkazilgan nazorat tadbirlari davomida ikki fuqaro 137 kilogramm veterinariya ma’lumotnomalari bo‘lmagan parranda ichki a’zolarini sanitariya qoidalariga zid ravishda sotayotgani aniqlanib, mahsulotlar zararsizlantirish yo‘li bilan yo‘q qilingan.

Bundan tashqari, sut va sut mahsulotlari bilan shug‘ullanuvchi sotuvchilar orasidan iste’molga yaroqsiz jami 29 litr yelim idishlardagi sut va sut mahsulotlari olinib o‘rnatilgan tartibda yo‘q qilingan.

Kelgusida salbiy oqibatlarning oldini olish maqsadida aniqlangan holatlar yuzasidan dehqon bozor hududida tushuntirish ishlari olib borilgan.

Avvalroq Toshkent viloyati IIBB Patrul-post xizmati va jamoat tartibini saqlash boshqarmasi Karantin tadbirlarini ta’minlash bo‘linmasi xodimlari tomonidan Yangiyo‘l tumanida kelib chiqishi noma’lum bo‘lgan to‘rt qop sifatsiz go‘sht mahsulotlari yo‘q qilingandi.