O‘zbekiston Ekologik partiyasi tashkil qilinganiga hali ko‘p vaqt bo‘lmadi. Aholi u haqida hali atroflicha tushunchaga ega emas. Ammo bu yilgi O‘zbekiston Respublikasi prezidentligiga saylovlarda ushbu partiya ham qatnashadi. Partiyadan ko‘rsatilgan nomzod Narzullo Oblomurodov 27-sentabr kuni qashqadaryolik saylovchilar bilan uchrashdi. Fuqarolar nomzodning saylovoldi dasturidan joy olgan masalalarni uning o‘zidan tingladi.
Ko‘pchilik saylovchida Ekologik partiya faqatgina ekologik muammolar bilan shug‘ullanadi, degan tushuncha shakllanib qoldi. Aslida unday emas. Ekopartiya nafaqat partiya nomiga xos muammolarni, balki iqtisodiy va ijtimoiy sohalarga ham e’tibor qaratadi. Buning misolini partiya o‘z oldiga qo‘ygan maqsadlarida ham ko‘rish mumkin: ekologik xavfsizlikni ta’minlash, yuzaga kelayotgan ekologik muammolarni hal etish bilan birgalikda iqtisodiy taraqqiyotni ta’minlashda jamiyatning barcha kuchlarini birlashtirish.
Bundan tashqari, Ekologik partiya iqtisodiy va taraqqiyotni ham “yashil” tarzda rivojlantirmoqchi. Narzullo Oblomurodov bu bo‘yicha partiyaning rejalarini ma’lum qildi.
“Ekologik partiya yashil taraqqiyot hamda yashil iqtisodiyotga o‘tishni jadallashtirish tarafdori. Kelajakda yashil iqtisodiyot taraqqiy topgan, qayta tiklanuvchi energiya hamda resurs tejamkor texnologiyalar joriy etilgan zamonaviy raqobatbardosh iqtisodiyotni barpo etishni asosiy maqsad qilgan”, — deydi nomzod.
Prezidentlikka nomzod Narzulla Oblomurodov iqlim o‘zgarishi muammmosini ham e’tibordan chetda qoldirmagan. U Orol dengizining ekologik falokati oqibatlarini yumshatishga qaratilgan innovatsion loyihalarni amalga oshirish orqali Orolbo‘yi mintaqasida ekologik va ijtimoiy-iqtisodiy vaziyatni, aholining yashash sharoitlarini yaxshilash uchun amaliy ishlar qilinishini aytib o‘tdi.
Narzullo Oblomurodov saylovchilar bilan uchrashgan hududdagi tegishli muammolarga ham alohida e’tibor qaratmoqda. Qashqadaryo viloyatida ayniqsa dolzarb bo‘lgan aholini toza ichimlik suv bilan ta’minlash masalasi nomzod dasturidan alohida o‘rin olgan. Ichimlik suv ta’minoti va kanalizatsiya tizimlarini yaxshilash bo‘yicha dasturiy vazifalarni amalga oshirish orqali aholining ichimlik suv ta’minotini 90 foizga yetkazish vazifasi qo‘yilgan.
Xalqaro hujjatlarni qabul qilish, sog‘liqni saqlash, ta’lim, ilm-fan va madaniy-ma’rifiy sohalarni yanada rivojlantirish, shuningdek, tashqi siyosat va xalqaro hamkorlikni rivojlantirish kabi sohalar nima bo‘ladi?
Albatta, ular ham o‘z navbatida rivojlantiriladi, kerakli o‘zgarishlar amalga oshiriladi. Bu bo‘yicha Narzullo Oblomurodov saylovchilar bilan yuzma-yuz uchrashuvda ma’lumot berib bormoqda. Yuqoridagi islohotlarning amalga oshishi uchun saylovchilardan faqatgina Narzullo Oblomurodov nomzodiga ovoz berish talab etiladi, xolos. Tanlov o‘zingizda! Yashil va sog‘lom kelajak uchun ovoz bering.
Reklama huquqi asosida.
Izoh (0)