Inter IKEA Systems B.V. kompaniyasi O‘zbekistonda IKEA tovar belgisini ro‘yxatdan o‘tkazish uchun Intellektual mulk agentligiga ariza yubordi, deya xabar bermoqda Spot.
Kompaniya faoliyat turlari ro‘yxati ariza ilovasida:
- yoritish, isitish, sovitish, bug‘ chiqarish, pishirish, quritish, shamollatish, suv ta’minoti, lampalar, muzlatgichlar uchun moslamalar va qurilmalar;
- mebel, nometall, suratlar uchun ramkalar, shu jumladan, kreslolar, divanlar, shkaflar, stollar, ko‘rpa-to‘shaklar va boshqalar;
- uy va oshxona anjomlari hamda idishlari;
- reklama xizmatlari, uchinchi shaxslar uchun marketing va sotishni rag‘batlantirish xizmatlari, franchayzing foydalanuvchilarining biznesini boshqarish, shuningdek, mebel, interyer buyumlari, ichki bezatish mahsulotlarini sotish va sotib olish bo‘yicha xodimlarni boshqarish xizmatlari keltirilgan.
Eslatib o‘tamiz, 8-fevral kuni O‘zbekiston Prezidenti Toshkent viloyatidagi investitsiya loyihalari bilan tanishgani to‘g‘risida xabar berilgandi. Unda davlat rahbariga IKEA kompaniyasining innovatsion mebel ishlab chiqarish fabrikasi qurilishi loyihasi ham taqdim etilgan. “Gazeta.uz”ning IKEA OAV bilan ishlash bo‘limiga tayanib yozishicha, kompaniya O‘zbekistonda fabrika ochishni rejalashtirayotganiga oid xabarlarni rad etgan.
“IKEA Supply’ning boshqa kompaniyalari singari, IKEA Industry O‘zbekistonda fabrika ochishni rejalashtirmayapti. Yangi bozorlarga kelsak, IKEA 2025-yilga qadar dunyo bo‘ylab ko‘proq xaridorlarni jalb qilishni davom ettirish maqsadida 12 ta yangi bozorga kirishni rejalashtirmoqda. Mazkur faoliyatni kengaytirish rejasida O‘zbekiston ishtirok etmaydi”, — deyilgandi kompaniya xabarida.
Izoh (0)