Qashqadaryo viloyati Chiroqchi tumanida homilador qo‘shnisini zo‘rlamoqchi bo‘lgan erkak pichoqlandi, deya xabar qilmoqda viloyat prokuraturasi.
Ma’lum qilinishicha, 2021-yilning 25-iyun kuni Chiroqchi tumani, “Langar” MFY, To‘laqul qishlog‘ida yashagan marhum J.A. qo‘shnisi — homilador N.J.ga nisbatan kuch ishlatib, uni jinsiy aloqa qilishga undagan.
Biroq yuzaga kelgan holatda o‘z nomusini himoya qilgan ayol yonida bo‘lgan oshxona pichog‘i bilan J.A.ga bir marotaba zarba bergan. Yetkazilgan tan jarohati natijasida J.A. vafot etgan.
Holat yuzasidan Jinoyat kodeksining 97-moddasi 1-qismi (qasddan odam o‘ldirish) bilan jinoyat ishi qo‘zg‘atilib, Chiroqchi tuman prokuraturasi tomonidan tergov harakatlari olib borilgan.
Tergov davomida marhum J.A.ning o‘limi yuzasidan Chiroqchi tumani prokurori tomonidan Langar qishlog‘ida aholi va jabrlanuvchilar bilan uchrashuvlar o‘tkazilgan. Marhumning yaqinlari tuman prokuraturasida bir necha marotaba qabul qilinib, ularning jinoyatga N.J.ning akasi va otasining ham aloqasi borligi haqidagi taxminlari dastlabki tergovda tekshirilganda, o‘z tasdig‘ini topmagan.
Tergov yakuniga ko‘ra, N.J.ga Jinoyat kodeksining 97-moddasi 1-qismi bilan ayblov e’lon qilinib, 2021-yil 7-sentabrda jinoyat ishi sud muhokamasiga yuborilgan.
Jinoyat ishi hozirda jinoyat ishlari bo‘yicha Chiroqchi tumani sudida ko‘rilmoqda.
Izoh (0)