Buxoro shahrida o‘z xizmat vazifasini bajarayotgan Milliy gvardiya harbiy xizmatchisining qonuniy talablarini bajarmasdan, unga faol qarshilik ko‘rsatib, tan jarohati yetkazgan fuqaroga nisbatan jinoyat ishi qo‘zg‘atildi. Bu haqda “Daryo”ga Milliy gvardiya viloyat bo‘yicha boshqarmasi ofitseri, katta leytenant Murodjon Rahmatullayev xabar berdi.
Ta’kidlanishicha, Buxoro shahrida yashovchi 23 yoshli fuqaro yashash uyi oldida bir ayol bilan janjallashib qolib, unga tarsaki tushirgan. Hududda xizmat olib borayotgan Milliy gvardiya xodimi Ibrohim Shodiyev esa ushbu janjalning guvohi bo‘lgan va holatni qonuniy bartaraf qilish uchun ularning oldiga borgan.Milliy gvardiya xodimi fuqarolardan o‘zini tanishtirishini talab qilgan. A.Sh. esa unga o‘z turmush o‘rtog‘i bilan janjallashayotganini va xodimning mazkur holatga aralashmasligini aytgan. Spirtli ichimlik ta’siridagi fuqaro jamoat joyida tartibbuzarlikda davom etgan. Vaziyat chigallashgach, Milliy gvardiya xodimi hamkasblarini yordamga chaqirgan. Holat joyiga Milliy gvardiya xodimlari yetib kelib, A.Sh.ning qarshilik qilishiga qaramay, uni xizmat avtomashinasiga mindirishga harakat qilgan. Biroq A.Sh. yana faol qarshilik ko‘rsatishda davom etgan. Milliy gvardiya xodimlari unga nisbatan kuch ishlatishga majbur bo‘lgan. Qattiq g‘azabda bo‘lgan A.Sh. xizmat vaqtida uni ushlashga urinib, bexosdan yiqilib tushgan Ibrohim Shodiyevning oyoqlariga bir necha marta tepib, jarohat yetkazgan.
Fuqaro A.Sh.ning shaxsi aniqlanganda, uning muqaddam bir necha marotaba jinoiy xatti-harakatlari uchun javobgarlikka tortilgani, qamalib chiqqani ma’lum bo‘lgan.
“Jamiyatda yurish-turish qoidalarini qasddan mensimagan A.Sh. janjalning oldini olish uchun kelgan Milliy gvardiya harbiy xizmatchisi, kichik serjant Ibrohim Shodiyevga og‘ir tan jarohati yetkazgan. Buni sud tibbiy ekspertizasi xulosasi ham tasdiqlagan. Shu bois unga nisbatan jinoyat kodeksining 277-moddasi 3-qismi “g” bandi (jamoat tartibini saqlash vazifasini bajarib turgan hokimiyat vakili yoki jamoatchilik vakiliga yoxud bezorilik harakatlarining oldini olish chorasini ko‘rgan boshqa fuqarolarga qarshilik ko‘rsatib sodir etilgan bezorilik) bilan jinoyat ishi qo‘zg‘atildi”, — deydi Murodjon Rahmatullayev.
Ayni paytda tergov harakatlari olib borilmoqda.
Izoh (0)