British Airways’ning Islomoboddan Londonga uchayotgan Boeing 777-200ER samolyoti 22-sentabr kuni Islom Karimov nomidagi Toshkent xalqaro aeroportiga qo‘ndi. Bu haqda Telegram’dagi “Novosti Tashkentskogo neba” kanali xabar berdi.
“Buyuk Britaniyaning Islomobod—London yo‘nalishi bo‘yicha uchayotgan ВА-260 reysi ekipaji parvoz vaqtida Toshkentdagi zahira aeroportga qo‘nish haqida qaror qabul qildi”, — deyiladi xabarda.
AviaSpotter’ning soat 08:30 da e’lon qilgan ma’lumotiga ko‘ra, ushbu reysdagi 83 yoshli yo‘lovchi ayol o‘zini yomon his qilgan. Samolyot Toshkentga yetib kelganida ayol vafot etgan. Barcha yo‘lovchilar samolyotdan tushirilib, Toshkent aeroporti hududiga joylashtirilgan.
“RIA Novosti”ning yozishicha, bu xabarni Toshkent aeroporti xodimi tasdiqlagan. Uning so‘zlariga ko‘ra, ayolning o‘limiga dastlabki sabab — yurak urishining to‘xtashi bo‘lgan. U marhumaning qaysi davlat fuqarosi ekanligini ayta olmagan.
Izoh (0)