Qashqadaryo viloyati hokimi Zoir Mirzayev 2021-yilning o‘tgan davri mobaynida viloyatda 129 ta paxsadan qurilgan maktab yangilanganini ma’lum qildi, deya xabar berdi “Daryo” muxbiri.
Ta’kidlanishicha, viloyat rahbari bu haqda Dehqonobod tumanida bo‘lib o‘tgan uch avlod uchrashuvida ma’lum qilgan.
“Men har doim aytib charchamayman, bir yilda ko‘pi bilan 100 ta maktabni ta’mirlardik, 20 ta yoki 40 ta yangi maktab qurardik. Agar tahlil qiladigan bo‘lsak, bir yilda Qashqadaryodagi mavjud 1210 ta maktabning 813 tasi qayta ta’mirlandi, yangilandi. Bu esa 600 milliard so‘m degani”, — degan viloyat hokimi.
Zoir Mirzayevning qo‘shimcha qilishicha, 2021-yil Qashqadaryodagi mavjud 129 ta paxsa maktab ham yangilangan.
Qayd etilishicha, 2021-yilda Qashqadaryodagi qurilish ishlariga respublika budjetidan 2,4 trillion so‘m mablag‘ ajratilgan.
“Biz o‘rtacha bir yillik qurilishlar uchun eng ko‘pi bilan 800 milliard so‘m mablag‘ olganmiz. Bu ham 2020-yilda bo‘lgan. Lekin 2021-yilda 2,4 trillion mablag‘ oldik. Xalqaro valyuta jamg‘armasining 2020-yil yakunlari bo‘yicha xulosasida butun dunyo iqtisodiyoti 4 foizga ortga ketgani ma’lum qilindi. Ammo O‘zbekistonda 1,7 foizga o‘sish kuzatildi. Shuning hisobiga respublikadagi qurilishlarga, jumladan, Qashqadaryoning o‘ziga 2,4 trillion mablag‘ berildi”, — dedi viloyat rahbari.
Eslatib o‘tamiz, Qashqadaryo viloyati hokimi Zoir Mirzayev Shavkat Mirziyoyevning 2020-yil 12—13-noyabr kunlari viloyatga tashrifi davomida berilgan topshiriqlar ijrosini o‘z vaqtida ta’minlash va hududni kompleks rivojlantirish masalalariga bag‘ishlangan yig‘ilishida so‘z olib, “Prezidentimiz ‘Bu yerga kelishimdan asosiy maqsad — sizlar bilan birga hudud rivojiga kuchli turtki berish bo‘yicha aniq vazifa va chora-tadbirlarni belgilab olish. Qashqadaryo o‘zining salohiyatiga mos yashamayapti, mamlakatimizning ko‘pgina hududlaridan ancha orqada’, deya ta’kidlaganlari bejiz emas. Maktablar yanada zamonaviylashadi va 2021-yilda birorta paxsa devorli ta’lim muassasalari qolmaydi. Kerak bo‘lsa, filial maktablar ham alohida ajralib chiqadi”, — degandi.
Izoh (0)