Andijonda so‘nggi besh yilda fuqaroligi bo‘lmagan 5035 nafar shaxsga O‘zbekiston fuqaroligi berilgani ma’lum bo‘ldi

Andijonda so‘nggi besh yil davomida viloyatda istiqomat qilayotgan 7305 nafar fuqaroligi bo‘lmagan shaxsning 5035 nafariga O‘zbekiston fuqaroligi berilgan. Bu haqda “Daryo” muxbiri Umidjon Mamarasulov xabar bermoqda.

Ta’kidlanishicha, viloyat Migratsiya va fuqarolikni rasmiylashtirish boshqarmasi tomonidan o‘tkazilgan matbuot anjumanida migratsiya va fuqarolikni rasmiylashtirish tizimi faoliyatini takomillashtirish, soha ishini rivojlantirish borasida olib borilayotgan hamda 2021-yilning sakkiz oyi davomida amalga oshirilgan ishlar haqida ma’lumot berilgan.

Boshqarma boshlig‘i vazifasini bajaruvchi, podpolkovnik Jahongir Ismoilovning qayd etishicha, so‘nggi besh yil davomida murojaat qilgan 3542 nafar fuqaroligi bo‘lmagan shaxsning 2891 nafariga Prezident farmoni asosida O‘zbekiston fuqaroligi berilgan.

“2016-yilda viloyatimizda 7305 nafar fuqaroligi bo‘lmagan shaxs istiqomat qilgan bo‘lsa, ayni paytda ularning soni 2270 tani takshil etadi. Qayd etish lozim, 2016-yildan hozirgi kunga qadar jami 3542 nafar fuqaroligi bo‘lmagan shaxs O‘zbekiston fuqaroligini olish uchun murojaat qilgan. Shundan 2891 nafarining murojaati qanoatlantirilib, Prezidentimizning tegishli farmonlari asosida 2017-yilda 108 nafar, 2018-yilda 598 nafar, 2019-yilda 1327 nafar, 2020-yilda 585 nafar, 2021-yilning o‘tgan davrida esa 268 nafariga O‘zbekiston Respublikasi fuqarolik pasporti berilgan. 145 nafar shaxsning esa iltimosnomasi Fuqarolik masalalari komissiyasi tomonidan qanoatlantirilmasligi ma’lum qilindi. Qolgan murojaatlar esa keyingi bosqichda ko‘rib chiqish uchun yuqori tashkilotlarga yuborilgan”, — deydi Jahongir Ismoilov.

Qo‘shimcha qilinishicha, 2020-yilning 10-mart kuni qabul qilingan “O‘zbekiston Respublikasining fuqaroligi to‘g‘risida”gi qonun hamda 2021-yilning 14-iyun kuni qonunga kiritilgan qo‘shimcha va o‘zgartirishlarga muvofiq mamlakatda 15 yildan buyon doimiy istiqomat qilib kelayotgan fuqaroligi bo‘lmagan shaxslarga to‘g‘ridan to‘g‘ri fuqarolik berishning yangi tartibi joriy etilgan.

“‘O‘zbekiston Respublikasining fuqaroligi to‘g‘risida’gi qonunning 6-moddasiga asosan 1995-yil 1-yanvar kuniga qadar O‘zbekiston Respublikasi hududiga ko‘chib kelib doimiy ro‘yxatdan o‘tib, viloyat hududida istiqomat qiluvchi fuqaroligi bo‘lmagan shaxslarning 1419 nafariga, kiritilgan qo‘shimcha va o‘zgartirishlarga asosan esa 15 yil davomida doimiy yashab kelayotgan 725 nafar shaxsga O‘zbekiston Respublikasi fuqarolik pasporti rasmiylashtirib berildi”, — deydi podpolkovnik Jahongir Ismoilov.

“Daryo” muxbirining qo‘shimcha qilishicha, matbuot anjumani yakunida fuqarolikka qabul qilingan 10 nafar fuqaroligi bo‘lmagan shaxsga O‘zbekiston Respublikasi fuqarosining identifikatsiya ID-kartalari tantanali ravishda topshirilgan.