Surxondaryo viloyati prokuraturasi ijtimoiy tarmoqlarda tarqalgan Uzun tumanida bir guruh shaxslar o‘rtasida sodir bo‘lgan mushtlashuv videosi bo‘yicha rasmiy ma’lumot berdi.
Ijtimoiy tarmoqlarda Uzun tumanida bir guruh shaxslar o‘zaro guruhbozlik qilib, ichimlik do‘konining oldida katta janjal uyushtirishgani tasvirlangan video tarqaldi.
Ma’lum qilinishicha, kadrlardagi holat 31-iyul kuni sodir bo‘lgan va 1-avgust kuni tuman IIB huzuridagi Tergov guruhi tomonidan Jinoyat kodeksining 277-moddasi (bezorilik) 3-qismi “g” bandi bilan jinoyat ishi qo‘zg‘atilib, viloyat prokuraturasi tomonidan tergov harakatlari olib borilgan.
Tergov davomida hodisa ishtirokchilarining shaxsi aniqlanib, tergovga jalb qilingan. Jinoyat ishi doirasida jami 20 nafar shaxs ayblov e’lon qilinib, shulardan 17 nafariga “qamoqqa olish tarzida”gi, 3 nafariga garov ehtiyot choralari qo‘llanilgan.
“Jinoyat ishi bo‘yicha tergov harakatlari tamomlanib, 20 nafar shaxsga nisbatan bo‘lgan jinoyat ishi ayblov xulosasi bilan 11-sentabr kuni mazmunan ko‘rib chiqishlik uchun jinoyat ishlari bo‘yicha Surxondaryo viloyati sudiga yuborilgan”, — deyiladi xabarda.
Shuningdek, jinoyat ishining 2 nafar ayblanuvchilarga nisbatan bo‘lgan qismi alohida ish yurituvga ajratilib, viloyat IIB tomonidan tergov harakatlari olib borilmoqda.
Avvalroq Toshkentda maktab o‘quvchilari o‘rtasida ommaviy mushtlashuv sodir bo‘lgani haqidagi xabarga izoh berilgani, Chilonzordagi kafeda janjal ko‘tarib, ichki ishlar xodimiga qo‘l ko‘targan shaxslar hibsga olingani, Nukusda bo‘lib o‘tgan festivaldan so‘ng janjal sodir bo‘lgani to‘g‘risida xabar berilgandi.
Izoh (0)