Xiaomi 11T va 11T Pro flagmanlari hamda eng yengil 5G smartfonini namoyish etdi (foto)

Xiaomi kompaniyasi yangi 11T va 11T Pro flagmanlari, shuningdek, eng yengil 5G-smartfon deya e’tirof etilayotgan Xiaomi 11 Lite 5G NE’ni taqdim etdi, deb xabar beradi “Afisha.uz”.

Xiaomi 11 Lite 5G NE

Xiaomi 11 Lite 5G NE modeli Xiaomi Mi 11 Lite (endilikda Mi qo‘shimchasisiz) seriyasiga kiradi. Yangi qurilma qalinligi 6,81 millimetrga teng korpusga ega bo‘lgan, og‘irligi — 158 gramm, 5G aloqa tarmog‘ini qo‘llab-quvvatlaydi, orqa tomoni xira rangli shishadan ishlangan.

Apparatga Full HD+ sifat va 90 gertsli yangilanish chastotasini qo‘llab-quvvatlaydigan diagonali 6,55 dyuymga teng AMOLED-displey o‘rnatilgan. Smartfonning kameralari to‘rtta: 20 megapikselli frontal, 64 megapikselli asosiy, 8 megapikselli keng burchak va 5 megapikselli qo‘shimcha datchik.

Apparat ichida Qualcomm Snapdragon 778G 5G protsessori, 6/8 gigabaytli tezkor va 128/256 gigabaytli tezkor xotira joylashgan. Akkumulyator sig‘imi 4250 mA/soatga teng bo‘lib, 33 vattli tezkor quvvatlanish funksiyasiga ega.

Yevropada mazkur smartfon narxi 435 dollardan boshlanadi.

Xiaomi 11T va 11T Pro

Jahon bozori uchun taqdim etilgan navbatdagi flagmanlar Xiaomi 11T va 11T Pro bo‘ldi.

Apparatlar Full HD+ sifat va 120 gertsli tasvir yangilanish chastotasiga ega 6,67 dyuymli AMOLED-displeylarga ega bo‘lgan. Ekrani Gorilla Glass Victus shishasi bilan qoplangan, sensorning so‘rov chastotasi 480 gertsga teng. Orqa paneli shisha bilan qoplangan. Barmoq izi skaneri o‘chirib-yoqish tugmasiga joylashtirilgan.

Xiaomi 11T uchiga MediaTek Dimensity 1200 Ultra protsessori 8 gigabayt tezkor va 128/256 gigabayt ichki xotira o‘rnatilgan. Xiaomi 11T Pro’ning “yuragi”ni esa Qualcomm Snapdragon 888 protsessori, 8/12 gigabayt tezkor va 128/256 gigabayt ichki xotira tashkil etadi. Ikkala qurilmaning ichidan ham sig‘imi 5000 mA/soatga teng akkumulyator o‘rin olgan, ammo 11T modeli 67 vattli, 11T Pro esa 120 vattli tezkor quvvatlanish funksiyasini ega.

Taqdimot vaqtida kompaniya vakillari Xiaomi 11T va 11T Pro video tasvirga olishni ham yaxshi uddalashini ma’lum qilgan. Masalan, yangi smartfonlarda maxsus kinoeffektlar mavjud bo‘lib, turfa videolar yaratish imkonini beradi. Bundan tashqari, roliklarni tele-makro kamera yordamida ham tasvirga olish mumkin, AudioZoom funksiyasi esa alohida sahnalardagi ovozni kuchaytirishga yordam beradi.

Yangi modellarning kamerasini texnik tavsifi: Xiaomi 11T’ning asosiy kamerasi 64 megapiksellni, Xiaomi 11T Pro’niki esa 108 megapiksellni tashkil etadi, shuningdek, 8 megapikselli yuqori keng burchakli, 5 megapikselli tele-makro va 16 megapikselli frontal kameralar mavjud.

Xiaomi 11T va 11T Pro’ning Yevropadagi narxlari:

• 11T 8/128 GB — 588 dollar;
• 11T 8/256 GB — 648 dollar;
• 11T Pro 8/128 GB — 765 dollar;
• 11T Pro 8/256 GB — 825 dollar;
• 11T Pro 12/256 GB — 884 dollar.

Bundan tashqari, Xiaomi kompaniyasi taqdimot davomida Pad 5, Mi Smart Band 6 NFC va boshqa qurilmalarining narxlarini ham e’lon qilgan:

• Pad 5 6/128 GB — 411 dollar;
• Pad 5 6/256 GB — 470 dollar;
• Mi Smart Projector — 706 dollar;
• Mesh System AX 3000 (2-Pack) — 93 dollar;
• Mi Smart Band 6 NFC — 65 dollar.

Avvalroq Xiaomi tasodifan Redmi 10 ning texnik tavsifini oshkor qilib qo‘ygani, Xiaomi o‘z foydalanuvchilaridan uzr so‘rab chiqqani, Xiaomi uchta smartfondan kiborg-terminator yasagani to‘g‘risida xabar berilgandi.