Rossiya O‘zbekistonga iqtisodiy manfaatlariga zarar yetmagan holda Jahon savdo tashkilotiga kirishida zaruriy ko‘mak berishga tayyor. Bu haqda Rossiya tashqi ishlar vaziri birinchi o‘rinbosari Andrey Rudenko Toshkentda 20-sentabr kuni tashkil etilgan “Rossiya va O‘zbekiston hamkorligining yangi tarixiy bosqichidagi taraqqiyot va xavfsizlik tahdidlari” mavzusidagi xalqaro anjumanda ma’lum qilgan.
Markaziy Osiyodagi siyosatimiz maksimal darajada ochiq. Bizning hech qanday yopiq rejamiz yo‘q. Hududdagi barcha davlatlar bilan ishonchga asoslangan, maksimal darajada haqqoniy prinsipial dialog asosidagi teng huquqli hamkorlik o‘rnatishga intilamiz. Menimcha, buning uddasidan chiqyapmiz. Biz boshqalardan farqli ravishda mintaqa davlatlari oldiga Rossiya tomondamisiz yoki unga qarshi, degan geosiyosiy jihatdan tanlov qilish talabini qo‘yish bo‘yicha g‘oya yoki rejalar tuzmaymiz. Siyosiylashtirmasdan, ko‘mak va yordam beramiz.Rudenko, shuningdek, anjuman doirasida TASS muxbirlariga bergan intervyusida Yevrosiyo iqtisodiy ittifoqi masalasiga ham to‘xtalgan. “O‘zbekistonning YeOIIga to‘liq kirishi borasida yakuniy qaror qilishga shoshiltirmayapmiz. Bu mamlakatning ixtiyorida, tashkilotga qachon qo‘shilish zarur, deb hisoblasa qo‘shiladi. Biz YeOII haqiqatda ham iqtisodiy rivojlanish uchun katta imkoniyatlar berishidan kelib chiqamiz. A’zo mamlakatlar hamda yaqindagina qo‘shilgan Armaniston va Qirg‘iziston ushbu tashkilotga a’zolikdan keladigan ustunlik va foydani o‘zlarida his qilib ko‘rishdi”, deydi vazir o‘rinbosari.Keng ma’noda aytganda, bizga eng muhimi mintaqaviy xavfsizlik masalasida farovon shart-sharoitlar yaratilishidir. Mintaqa davlatlarining iqtisodiy va ijtimoiy rivojlanishi uzoq muddatli amaliy munosabatlarning qo‘llab-quvvatlanishi va taraqqiy etishining omilidir.
Yevrosiyo iqtisodiy ittifoqi doirasidagi o‘zaro munosabatlarimiz chuqurlashib bormoqda. Shuni to‘la qoniqish bilan shuni qayd etish kerakki, 2020-yil dekabrida O‘zbekiston YeOIIga uning huzuridagi kuzatuvchi davlat maqomida qo‘shildi. Ushbu maqom beradigan ustunliklarning barchasini amalga tatbiq etishga erishiladi, degan umiddamiz. Birinchi navbatda xalqlarimizning farovonligini oshirishda, hamkorlikni rivojlantirishda.
YeOIIga a’zo davlatlarning aksariyati Jahon savdo tashkilotiga ham a’zo sanaladi. Amaliyotda ko‘ringanidek, ushbu tizimlarning asosiy prinsiplari bir-birini inkor etmaydi. Biz O‘zbekistonga iqtisodiy manfaatlariga zarar yetmagan holda JSTga kirishda zaruriy ko‘mak berishga tayyormiz.
Andrey Rudenko, Rossiya Tashqi ishlar vaziri birinchi o‘rinbosari
Eslatib o‘tamiz, O‘zbekiston Yevrosiyo iqtisodiy ittifoqi huzuridagi kuzatuvchi davlat maqomini ushbu tashkilotning 2020-yil 11-dekabrdagi sammitida olgan edi.
Bundan avval O‘zbekiston Yevropa Ittifoqiga bojxona bojisiz eksport qiladigan mahsulotlar qatori ikki barobarga oshgani, Investitsiyalar va tashqi savdo vazirligi tuzilmasida Rossiya bilan hamkorlik boshqarmasi tashkil etilgani hamda O‘zbekiston YeOII bilan investitsiyaviy hamkorlikni oshirishga tayyorligi haqida xabar berilgandi.
Izoh (0)