Россия Ўзбекистонга иқтисодий манфаатларига зарар етмаган ҳолда Жаҳон савдо ташкилотига киришида зарурий кўмак беришга тайёр. Бу ҳақда Россия ташқи ишлар вазири биринчи ўринбосари Андрей Руденко Тошкентда 20 сентябрь куни ташкил этилган «Россия ва Ўзбекистон ҳамкорлигининг янги тарихий босқичидаги тараққиёт ва хавфсизлик таҳдидлари» мавзусидаги халқаро анжуманда маълум қилган.
Марказий Осиёдаги сиёсатимиз максимал даражада очиқ. Бизнинг ҳеч қандай ёпиқ режамиз йўқ. Ҳудуддаги барча давлатлар билан ишончга асосланган, максимал даражада ҳаққоний принципиал диалог асосидаги тенг ҳуқуқли ҳамкорлик ўрнатишга интиламиз. Менимча, бунинг уддасидан чиқяпмиз. Биз бошқалардан фарқли равишда минтақа давлатлари олдига Россия томондамисиз ёки унга қарши, деган геосиёсий жиҳатдан танлов қилиш талабини қўйиш бўйича ғоя ёки режалар тузмаймиз. Сиёсийлаштирмасдан, кўмак ва ёрдам берамиз.Руденко, шунингдек, анжуман доирасида ТАСС мухбирларига берган интервьюсида Евросиё иқтисодий иттифоқи масаласига ҳам тўхталган. «Ўзбекистоннинг ЕОИИга тўлиқ кириши борасида якуний қарор қилишга шошилтирмаяпмиз. Бу мамлакатнинг ихтиёрида, ташкилотга қачон қўшилиш зарур, деб ҳисобласа қўшилади. Биз ЕОИИ ҳақиқатда ҳам иқтисодий ривожланиш учун катта имкониятлар беришидан келиб чиқамиз. Аъзо мамлакатлар ҳамда яқиндагина қўшилган Арманистон ва Қирғизистон ушбу ташкилотга аъзоликдан келадиган устунлик ва фойдани ўзларида ҳис қилиб кўришди», дейди вазир ўринбосари.Кенг маънода айтганда, бизга энг муҳими минтақавий хавфсизлик масаласида фаровон шарт-шароитлар яратилишидир. Минтақа давлатларининг иқтисодий ва ижтимоий ривожланиши узоқ муддатли амалий муносабатларнинг қўллаб-қувватланиши ва тараққий этишининг омилидир.
Евросиё иқтисодий иттифоқи доирасидаги ўзаро муносабатларимиз чуқурлашиб бормоқда. Шуни тўла қониқиш билан шуни қайд этиш керакки, 2020 йил декабрида Ўзбекистон ЕОИИга унинг ҳузуридаги кузатувчи давлат мақомида қўшилди. Ушбу мақом берадиган устунликларнинг барчасини амалга татбиқ этишга эришилади, деган умиддамиз. Биринчи навбатда халқларимизнинг фаровонлигини оширишда, ҳамкорликни ривожлантиришда.
ЕОИИга аъзо давлатларнинг аксарияти Жаҳон савдо ташкилотига ҳам аъзо саналади. Амалиётда кўринганидек, ушбу тизимларнинг асосий принциплари бир-бирини инкор этмайди. Биз Ўзбекистонга иқтисодий манфаатларига зарар етмаган ҳолда ЖСТга киришда зарурий кўмак беришга тайёрмиз.
Андрей Руденко, Россия Ташқи ишлар вазири биринчи ўринбосари
Эслатиб ўтамиз, Ўзбекистон Евросиё иқтисодий иттифоқи ҳузуридаги кузатувчи давлат мақомини ушбу ташкилотнинг 2020 йил 11 декабрдаги саммитида олган эди.
Бундан аввал Ўзбекистон Европа Иттифоқига божхона божисиз экспорт қиладиган маҳсулотлар қатори икки баробарга ошгани, Инвестициялар ва ташқи савдо вазирлиги тузилмасида Россия билан ҳамкорлик бошқармаси ташкил этилгани ҳамда Ўзбекистон ЕОИИ билан инвестициявий ҳамкорликни оширишга тайёрлиги ҳақида хабар берилганди.
Изоҳ (0)