Respublika maxsus komissiyasi O‘zbekistonda juma namozlarini faqat ochiq sahnalarda ado etilishiga oid cheklovni bekor qildi, deb xabar beradi SSV matbuot xizmati.
Ma’lum qilinishicha, Respublika maxsus komissiyasining navbatdagi yig‘ilishida mamlakatda karantin talablarini qisqartirish orqali aholiga madaniy va ma’naviy hordiq chiqarish hamda dam olishini mazmunli o‘tkazish uchun qulay shart-sharoitlar yaratish masalasi atroflicha muhokama qilingan.
Jumladan, Respublika maxsus komissiyasining majlisida O‘zbekiston musulmonlari idorasi hamda Din ishlari bo‘yicha qo‘mitaning 2021-yil 24-sentabrdan e’tiboran juma namozi va boshqa namozlarni masjidlarning faqat ochiq sahnalarida ado etilishiga oid cheklovni bekor qilish to‘g‘risidagi taklifi ko‘rib chiqilgan hamda ma’qullangan.
Eslatib o‘tamiz, O‘zbekistonda iyul o‘rtalaridan boshlab koronavirus bilan kasallanish holatlari ortgani sabab juma namozlarini masjidlarda o‘qish bekor qilingandi. 13-avgustdan boshlab esa masjidlarning barcha ishchi va xodimlari (salomatligi bo‘yicha qarshi ko‘rsatma bo‘lgan xodimlari bundan mustasno) koronavirusga qarshi vaksinaning (turidan qat’i nazar) kamida 2 ta dozasi bilan emlangani to‘g‘risidagi sertifikatga ega bo‘lgan taqdirda ushbu masjidlarda juma namozini o‘tkazishga ruxsat berilgan edi.
Izoh (0)