O‘zbekistonda saylovchilar soni 21,2 million kishidan oshgan. Bu haqda Markaziy saylov komissiyasi raisi Zayniddin Nizomxo‘jayev Toshkentdagi xalqaro konferensiyada ma’lum qildi.

Foto: “Daryo” / Madina Nurman

Markaziy saylov komissiyasi raisining ma’lum qilishicha, hozirda saylovchilarning yagona elektron ro‘yxatiga 21 million 249 ming 921 nafar saylovchi kiritilgan. Ulardan 6 million 993 ming 924 nafarini (qariyb 33 foizi) 30 yoshgacha bo‘lgan yoshlar tashkil etadi.

Shulardan 880 ming 155 nafar yoshlar bu yil ilk marotaba o‘zining saylov huquqidan foydalanadi.

“Joriy yilda bo‘ladigan O‘zbekiston Prezidenti saylovini o‘tkazuvchi okrug saylov komissiyalari tarkibida navqiron avlod vakillari har qachongidan ko‘p: 31 yoshgacha bo‘lgan yigit-qizlar soni-salmog‘i 9 foizni tashkil etsa, 41 yoshgacha bo‘lganlar esa 28 foizgacha yetdi”, — deydi Nizomxo‘jayev.

Shuningdek, MSK raisining ta’kidlashicha, saylovda dunyoning 50 ga yaqin mamlakati hamda o‘nlab xalqaro tashkilotlardan kuzatuvchilar ishtirok etishi kutilmoqda.

Ma’lumot uchun, Prezident saylovi 24-oktabr kuni o‘tkaziladi. Saylovga jami 300 milliard so‘m, har bir nomzodga esa 3 milliard so‘mdan ajratiladi.

Bundan avval chet eldagi O‘zbekiston fuqarolari uchun 49 ta davlatda statsionar va ko‘chma saylov uchastkalari tashkil etilishi, O‘zbekiston Prezidenti saylovlarini o‘tkazish uchun saylov okruglari tashkil etilgani hamda Maqsuda Vorisova Prezidentlik saylovida g‘alaba qozonsa, islohotlarni nimadan boshlashini ma’lum qilgani haqida xabar berilgandi.