O‘zbekistonning Toshkent, Turkmanistonning esa Ashxobod shahrida Leningrad qamali xotirasi bilan bog‘liq yodgorliklar o‘rnatilishi mumkin. “TASS”ning yozishicha, bu haqda Sankt-Peterburg ma’muriyati matbuot xizmati xabar berdi.
Xabarda aytilishicha, 6-sentabr kuni Sankt-Peterburg gubernatori Aleksandr Beglov Rossiya tashqi ishlar vaziri Sergey Lavrov bilan ishchi uchrashuvda Turkmaniston va O‘zbekistondagi sheriklari bilan bu masalani o‘rganish haqida to‘xtalib o‘tgan.
“Yaqinda Manchesterda yodgorlik taxtasi o‘rnatildi. Oldinroq Qirg‘iziston va Armanistonda blokada bolalari uchun yodgorliklar ochilgan edi. Urush paytida bu respublikalar evakuatsiya qilingan leningradliklarni qabul qilgan. Biz sheriklarimiz bilan birgalikda hozirda Ashxobod va Toshkentda blokada monumentlarini yaratish ustida ishlayapmiz”, — degan Sankt-Peterburg gubernatori Aleksandr Beglov.
Ma’lumot uchun, Leningrad qamali paytida urushdan, sovuqdan va ochlikdan 420 ming nafar aholi vafot etgan, shulardan 7 ming nafari o‘zbekistonlik askarlar bo‘lgan va ular xotirasiga Sankt-Peterburg shahridagi Pskaryevskiy qabristonida yodgorlik o‘rnatilgan.
Izoh (0)