Ижтимоий тармоқларда Инновацион ривожланиш вазирлиги олдидаги асфальтланган йўл МЧЖга бериб юборилгани, фақат вазирлик ходимларигина бу йўлдан ўтишига рухсат берилгани тўғрисида хабар тарқалди. Вазирлик хабар юзасидан изоҳ берди.
Маълум қилинишича, 7 сентябрь куни «Беруний» метро бекати томондан Университет кўчасига кириш йўли беркитилган ва бу барча қатори Инновацион ривожланиш вазирлиги ходимларига ҳам ноқулайлик туғдирган. 7 сентябрь куни вазирликда бўлиб ўтган йирик халқаро илмий-амалий конференцияга ташриф буюрган меҳмонлар, ОАВ вакиллари ҳам йўл ёпиқ бўлгани боис вазирликка киришга қийналган.
Қайд этилишича, ушбу йўлнинг 7 сентябрь куни ёпилишига Инновацион ривожланиш вазирлигининг алоқаси йўқ. «Беруний» метро бекати ёнидаги автотураргоҳни тартибга солишга масъул «Пойтахт Авто Паркинг» МЧЖда фаолият юритаётган ходимлар Талабалар шаҳарчасига келадиган автомашиналарнинг автотураргоҳга қўйилишини таъминлаш мақсадида ушбу йўлни ёпиб қўйишгани маълум бўлди.
Шундан сўнг Олмазор тумани ҳокимияти томонидан «Беруний» метросидан Университет кўчасига транспорт ҳаракати очиб қўйилган. Университет кўчасидан автомашиналарнинг тўсиқларсиз кириб-чиқиши таъминланмоқда.
Изоҳ (0)