Хабарингиз бор, Олмалиқ кон-металлургия комбинатида бир қатор инвестиция лойиҳалари амалга оширилмоқда. Улардан бири Ўзбекистон Республикаси Президентининг 2017 йил 1 мартдаги «Ёшлик I» кони негизида «Олмалиқ КМК» АЖнинг ишлаб чиқариш қувватларини кенгайтириш чора-тадбирлари тўғрисида»ги ПҚ 2807-сонли қарори асосида «Ёшлик I» конини ўзлаштиришдир.
Ушбу инвестиция лойиҳаси доирасида йилига 60 миллион тонна рудани қайта ишлаш қувватига эга бўлган 3-мис бойитиш фабрикаси ҳам барпо этилмоқда. Янги саноат корхоналарининг узлуксиз технологик жараёнини таъминлаш учун қўшимча электр энергияси билан таъминловчи станциялар зарур бўлади. Айнан шу мақсадда «Ёшлик I» конини ҳамда янги барпо этилаётган 3-мис бойитиш фабрикасининг электр энергиясига бўлган эҳтиёжини қондириш учун янги нимстанция қурилиши бошланди.
Мазкур йўналишда замонавий 550/110/10кВ кучланишли «Технологик»(Туккет) пасайтириб берувчи электр нимстанцияси барпо этилмоқда.
Нимстанцияни қуриш ишлари жорий йилнинг март ойида бошланган. Қурилиш ишларига бош пудратчи ташкилоти сифатида EPC тайёр ҳолда топшириш шарти билан JSC O‘zelektroapparat-Electroshield компанияси жалб этилган. Айни кунларда ORU-500 кв очиқ тақсимлаш ускунани ўрнатиш ишлари бошлаб юборилган. Ҳозирда нистанциянинг трансформатор тармоғи кучланишли трансформаторлари учун темир бетон пойдеворини монтаж қилиш ишлари амалга оширилмоқда. Шунингдек, 500 кв кучланишли электр узатиш ҳаво линиялар учун таянчларни йиғиш ва монтаж қилиш ишлари ҳам бажарилмоқда.
Қурилиш ишларига айни пайтда пудрат ташкилотининг 80 нафарга яқин мутахассислари жалб этилган. Бундан ташқари, 20 дона махсус қурилиш техника воситалари ва юк машиналари сафарбар этилган.
«Технологик»(Туккет) нимстанцияси 2023 йилнинг 1-чорагида фойдаланишга топширилиши режалаштирилган.
Пировардида мазкур замонавий нимстанция ишга тушиши билан янги истиқболли кон сифатида эътироф этилаётган «Ёшлик-1» кони ОКМК электр тармоқларига уланади, шунингдек, ҳозирда фойдаланиб келинаётган комбинат нимстанцияларининг юкламаси қисман камаяди.
3-МБФ билан биргаликда унинг фаолиятини барқарор таъминлаш мақсадида, сув таъминоти объектлари ҳамда янги оҳак заводи қурилишлари белгиланган.
Маълумот ўрнида яна шуни айтиш мумкинки, «Ёшлик-I» конини ўзлаштриш лойиҳаси амалга ошса, йилига 105 миллион тонна руда қазиб олиш қувватига эга бўлган кон, 60 миллион тонна руда қайта ишлаш имкониятга эга бўлган янги 3-сонли мис бойитиш фабрикасидан ташқари, кейинги босқичларда 50 миллион тонна руда қайта ишлаш имкониятига эга бўлган янги 4-сонли мис бойитиш фабрикаси, 400 минг тонна мис ишлаб чиқариш қувватига эга мис электролизи цехи, 1 миллион 800 минг тонна сулфат кислотаси ишлаб чиқариш цехи, 110 минг куб метр кислород ишлаб чиқариш қувватлари қурилади.
Бундан ташқари, янги 2 ва 3-сонли эритиш (Ванюков) печлари, янги анодлаш ва узлуксиз конверторлаш бўлимларининг қурилиши амалга оширилади ҳамда 6000 та янги иш ўринлари яратилади.
ОКМК ахборот хизмати
Изоҳ (0)