O‘zbekiston Oliy Majlisi Senati raisi Tanzila Norboyeva boshchiligidagi mamlakat delegatsiyasi Venada Avstriya Parlamenti va Birlashgan Millatlar Tashkiloti bilan hamkorlikda tashkil etilgan Parlamentlararo ittifoqqa a’zo davlatlar parlamentlari ayol rahbarlari sammitida ishtirok etdi. Bu haqda Senat axborot xizmati xabar qildi.
Unda pandemiya oqibatlarini bartaraf etish va mamlakatlarni pandemiyadan so‘ng tiklashda ayollarning ishtirok etishi masalalari muhokama qilindi hamda dolzarb masalalarga parlamentning samarali ta’sir choralari ko‘rib chiqildi.
Sammit ishtirokchilariga O‘zbekistonda gender tenglik sohasida amalga oshirilayotgan islohotlar haqida batafsil ma’lumot berildi.
O‘zbekistonning pandemiyadan keyingi davrdagi ustuvor yo‘nalishlaridan biri sifatida xotin-qizlarning e’tiborini iqtisodiy rag‘batlarga qaratib, ularning sohadagi ishtirokini qo‘llab-quvvatlash va rag‘batlantirish, ularga grantlar, kreditlar ajratish, shuningdek, qizlar, ayollarni o‘qitish va kasb-hunarlarga o‘rgatish bo‘yicha tajribaga alohida e’tibor qaratildi.
Shuningdek, respublikada xotin-qizlarning siyosiy faolligini oshirish borasidagi ishlar qayd etildi.
Parlamentlar ayol rahbarlarining navbatdagi 14-sammitini 2022-yilda O‘zbekistonda o‘tkazish to‘g‘risida kelishuvga erishildi.
Dunyo mamlakatlari parlamentlari ayol rahbarlari ishtirokida bunday yuqori darajadagi tadbir O‘zbekiston va umuman mintaqada ilk marotaba tashkil etiladi.
“Sammitni O‘zbekistonda o‘tkazish yuzasidan qabul qilingan ushbu qaror – bu jahon hamjamiyati tomonidan O‘zbekistonning parlamentarizmni rivojlantirish borasidagi natijalari, gender siyosatidagi sezilarli yutuqlar, shuningdek, jamiyatni demokratlashtirish yo‘lida amalga oshirilayotgan tub islohotlar muvaffaqiyatlarining e’tirofidir”, – deyiladi Senat xabarida.
Mavzuga doir:
Izoh (0)