Shavkat Mirziyoyev tadbirkorlarga soliq sohasida qator yengilliklar beruvchi farmonni imzoladi

Shavkat Mirziyoyev 7-sentabr kuni “Soliq majburiyatlarini bajarishda tadbirkorlik subyektlariga yanada qulay shart-sharoitlar yaratish chora-tadbirlari to‘g‘risida”gi farmonni imzoladi. Bu haqda O‘zA ma’lum qildi.

Ta’kidlanishicha, 20-avgust kuni o‘tkazilgan Prezidentning tadbirkorlar bilan ochiq muloqoti doirasida belgilangan vazifalar ijrosini ta’minlash maqsadida farmon:

— soliq ma’muriyatchiligini yanada takomillashtirish;

— soliq qonunchiligini buzganlik uchun javobgarlikni liberallashtirish orqali ishbilarmonlik muhitini yaxshilash;

— tadbirkorlarning muammo va takliflarini bevosita o‘rganish;

— tadbirkorlikni kelgusida rivojlantirishning asosiy yo‘nalishlarini belgilab olish bo‘yicha qabul qilingan.

Belgilanishicha, 2022-yil 1-yanvardan boshlab:

• kameral soliq tekshiruvi natijalari bo‘yicha aniqlangan huquqbuzarliklar uchun moliyaviy sanksiyalar qo‘llanilmaydi;
• tadbirkorlik subyektlari tomonidan soliq hisobotini belgilangan muddatlarda taqdim etmaganlik uchun moliyaviy sanksiyalar bekor qilinadi.

Davlat soliq qo‘mitasining 2022-yil yanvar—iyul oylarida eksperiment tariqasida Xorazm viloyati davlat soliq boshqarmasida hisobda turgan soliq to‘lovchilarning qo‘shilgan qiymat solig‘i, aksiz solig‘i, aylanmadan olinadigan soliq va yuridik shaxslardan olinadigan yer solig‘i bo‘yicha soliq hisobotlarining soliq organlari tomonidan hisoblab chiqarilishi va shakllantirib berilishi to‘g‘risidagi taklifi qo‘llab-quvvatlanadi.

Farmonga muvofiq eksperiment doirasida:

a) soliq organlari:

• yuridik shaxslardan olinadigan yer solig‘ini Kadastr agentligi organlari ma’lumotlari asosida;
• qo‘shilgan qiymat solig‘i, aksiz solig‘i va aylanmadan olinadigan soliqni elektron hisobvaraq-faktura va onlayn nazorat-kassa texnikasi ma’lumotlari hamda soliq organlarida mavjud boshqa ma’lumotlar asosida hisoblab chiqaradi va soliq hisobotini shakllantiradi;

b) soliq organlari tomonidan shakllantirilgan soliq hisoboti soliq to‘lovchilar uchun belgilangan tegishli soliq hisobotini taqdim etish muddatidan kamida 10 kun oldin soliq to‘lovchining shaxsiy kabineti orqali yuboriladi;

v) soliq to‘lovchi soliq organlari tomonidan shakllantirilgan soliq hisobotini olgan kundan boshlab 5 kun ichida uni tasdiqlaydi yoki, agar e’tirozlari mavjud bo‘lsa, uni rad etgan holda soliq hisobotini qayta ishlaydi va o‘rnatilgan tartibda soliq organlariga taqdim etadi.

Davlat soliq qo‘mitasi manfaatdor vazirlik va idoralar bilan birgalikda:

a) 2022-yil 1-yanvarga qadar soliq to‘lovchilarga qo‘shilgan qiymat solig‘i, aksiz solig‘i va aylanmadan olinadigan soliqni hisoblash uchun zarur bo‘lgan soliq solish obyekti yoki soliq solish bilan bog‘liq boshqa obyektlarni elektron hisobvaraq-fakturalarda aks ettirish imkoniyatlarini yaratadi.

b) Quyidagilarni Vazirlar Mahkamasiga kiritadi:

• 2021-yil 1-noyabrga qadar qonunchilik hujjatlariga mazkur farmondan kelib chiqadigan o‘zgartirish va qo‘shimchalar to‘g‘risida, shuningdek, soliq solish obyekti va (yoki) soliq solish bilan bog‘liq boshqa obyektlar bo‘yicha ma’lumot taqdim etish talablarini buzganlik uchun javobgarlik choralarini kuchaytirish bo‘yicha takliflarni;
• 2022-yil 1-avgustga qadar eksperiment natijalarini chuqur tahlil qilgan holda uni respublikaning barcha hududlaridagi soliq to‘lovchilarga tatbiq etish hamda soliq organlari tomonidan soliq hisoboti shakllantiriladigan soliqlar ro‘yxatini kengaytirish bo‘yicha takliflarni.

Mazkur farmon ijrosini samarali tashkil qilishga mas’ul va shaxsiy javobgar etib Davlat soliq qo‘mitasi raisi Sherzod Kudbiyev belgilanadi. Farmon ijrosini nazorat qilish bosh vazir o‘rinbosari Jamshid Qo‘chqorov zimmasiga yuklanadi.

Amalga oshirilayotgan chora-tadbirlar natijadorligi yuzasidan 2022-yil 1-avgustgacha Prezidentga axborot beriladi.