Surxondaryo viloyati aholisini toza ichimlik suvi bilan taminlaydigan yirik loyihani boshlashga start berildi. Bu haqda 6-sentabr kuni viloyat hokimligi matbuot xizmati xabar berdi.
Qayd etilishicha, bugungi kunda Surxondaryo viloyati aholisining 44,6 foizi markazlashgan ichimlik suvi bilan ta’minlanmagan. 218 ta suv inshooti va 3 ming kilometrdan ziyod tarmoqlar ta’mirga muhtoj. Viloyatning janubiy tumanlari va Termiz shahrida suv mineralizatsiyasi miqdori oshgan.
Shu bois Prezident Shavkat Mirziyoyev joriy yilning 1—2-iyun kunlari viloyatga tashrifi chog‘ida To‘palang suv omboridan ichimlik suvi tarmog‘i tortish bo‘yicha ko‘rsatma bergan edi. Shunga muvofiq dastlabki loyiha ishlab chiqildi.
Loyihaga ko‘ra, To‘palang suv omborining quyi qismida bosimni so‘ndirish, suvni tozalash va tarqatish inshootlari quriladi. U yerdan tumanlardagi suv taqsimlash uzellarigacha jami 361 kilometr quvur tortiladi. Bu tizim samarasida Sariosiyo, Denov, Sho‘rchi, Qumqo‘rg‘on, Jarqo‘rg‘on, Bandixon, Qiziriq, Sherobod, Angor, Muzrabot, Termiz tumanlari va Termiz shahridagi 1,7 million aholining suv ta’minoti yaxshilanadi.
Loyihaning umumiy qiymati 138 million dollar bo‘lishi hisob-kitob qilingan. U mahalliy To‘palang HPD Platinum korxonasi tomonidan 2021—2023-yillar davomida bosqichma-bosqich ishga tushiriladi (dastlabki ma’lumotlarda 2024-yilda ishga tushirilishi aytilgandi).
Viloyat hokimligida o‘tkazilgan videoselektor yig‘ilishdan so‘ng bosh vazir birinchi o‘rinbosari Ochilboy Ramatov, Surxondaryo viloyati hokimi To‘ra Bobolov, senator Abdug‘ani Sanginov Sariosiyo tumanida bo‘lib, qurilish ishlarini boshlab berdi.
Sariosiyo, Qumqo‘rg‘on va Sherobod tumanlarida tashkil etilgan qurilish shtabida davlat va jamoat tashkilotlari rahbarlari, mutaxassislar, quruvchilar va keng jamoatchilik vakillari ishtirokida loyihaning taqdimotlari o‘tkazildi.
Ochiq ma’lumotlarga ko‘ra, To‘palang HPD Platinum MChJning yagona ta’sischisi To‘palang HPD Holding MChJ hisoblanadi. Mazkur MChJ ulushining katta qismi — 61,70 foiz qismi Abdurahmonov Islom Abdug‘aniyevichga tegishli. U, Telegram’dagi “Davletovuz” kanali ma’lumotlariga ko‘ra, “O‘zbekgidroenergo” aksiyadorlik jamiyati boshqaruvi raisi, senator Sanginov Abdug‘ani Abdurahmonovichga yaqin qarindosh bo‘ladi.
“Gazeta.uz” ma’lumotlariga ko‘ra, To‘palang HPD Holding Prezidentning 2003-yil 24-yanvardagi farmoni talablari asosida “To‘palang suv ombori va GES qurilish”ning “To‘palangsuvGESqurilish” MChJ etib qayta tashkil etilishi natijasida vujudga kelgan, 2017-yil dekabrida yana qayta tashkil etilgan. Uning asosiy faoliyat turlari GES, suv xo‘jaligi inshootlari, gidrouzellar qurish, kanal hamda drenajlar qazish va boshqalarda qurilish-montaj ishlarini amalga oshirishdan iborat.
Xabarda mazkur loyihani bajaruvchi tender yoki boshqa tartibda tanlab olingani haqida ma’lumot keltirilmagan.
Eslatib o‘tamiz, shu yilning 10-may kuni Oliy sudning Jinoyat ishlari bo‘yicha sudlov hay’atida “Sardoba” suv omboridagi ofat bo‘yicha o‘qilgan sud hukmida holding tarkibiga kiruvchi To‘palang HDP Irrigation Systems MChJ rahbari lavozimida ishlagan B. Asadovga o‘tash uchun uzil-kesil 4 yil muddatga ozodlikdan mahrum qilish va bazaviy hisoblash miqdorining 600 baravari miqdorida 133 800 000 so‘m jarima jazolari tayinlangan edi.
Izoh (0)