Marg‘ilondagi maktabda o‘qituvchilar majburiy mehnatga jalb etilgani haqidagi xabarga munosabat bildirildi

Ijtimoiy tarmoqlarda “Marg‘ilonda ustozlar majburiy ishga jalb etildimi?” sarlavhali xabar tarqaldi. Holat yuzasidan Mehnat vazirligi ma’lumot berdi.

Ushbu holat yuzasidan Farg‘ona shahar Aholi bandligiga ko‘maklashish markazi Davlat mehnat inspeksiyasi tomonidan o‘rganish o‘tkazildi. O‘rganish davomida majburiy mehnat holati aniqlanmagan, biroq 15-sonli umumiy o‘rta ta’lim maktabi xodimlariga nisbatan mehnat qonunchiligi talablari buzilgan.

Mazkur holat bo‘yicha Marg‘ilon shahar 15-sonli umumiy o‘rta ta’lim maktabi direktori v.v.b.ga nisbatan Ma’muriy javobgarlik to‘g‘risidagi kodeksning 49-moddasi 1-qismi (mehnat va mehnatni muhofaza qilish to‘g‘risidagi qonunchilikni buzish) bilan eng kam oylik ish haqqining 10 barobari miqdorida jarima qo‘llanildi.

Bundan avval Sirdaryoda o‘qituvchilarni majburiy mehnatga jalb qilgan maktab direktori 12 mln so‘m jarimaga tortilgani, Qashqadaryoda o‘qituvchilarni majburiy mehnatga jalb qilgan direktor ishdan olingani hamda Andijonda uyida obodonlashtirish xodimlarini majburan ishlatgan prokuror ishdan olingani haqida xabar berilgandi.