O‘zbekiston tashqi ishlar vaziri Abdulaziz Komilov va Buyuk Britaniya tashqi ishlar, hamdo‘stlik va taraqqiyot masalalari bo‘yicha vaziri Dominik Raab o‘rtasida telefon orqali muloqot bo‘lib o‘tdi.
Tashqi siyosiy idoralar rahbarlari mintaqaviy va xalqaro kun tartibining dolzarb masalalarini, shuningdek, ikki tomonlama munosabatlar rivojini muhokama qildi.
So‘nggi yillarda O‘zbekiston va Buyuk Britaniya o‘rtasidagi hamkorlik jadal rivojlanib, sifat jihatidan yangi bosqichga ko‘tarilgani qayd etildi.
Afg‘onistondagi vaziyat va mazkur mamlakatda tinch siyosiy jarayonga ko‘maklashish borasida fikr almashildi. Har ikki tomonning bu yo‘nalishda hamkorlikni kengaytirishdan birday manfaatdor ekani ma’lum qilindi.
Bundan avval Abdulaziz Komilov Italiya tashqi ishlar vaziri bilan Afg‘onistondagi vaziyatni muhokama qilgani, O‘zbekiston Prezidentining Afg‘oniston bo‘yicha maxsus vakili Ismatulla Irgashev Turkiya elchisi Olgan Bekar bilan uchrashgani hamda Abdulaziz Komilov Toshkentda Germaniya tashqi ishlar vaziri bilan uchrashuv o‘tkazgani haqida xabar berilgandi.
Izoh (0)