Ukraina prezidenti Vladimir Zelenskiy o‘zining siyosatga kirib kelishini Apple asoschisi Stiv Jobsning faoliyat yo‘liga qiyosladi. Stenford universitetidagi nutqi chog‘ida Zelenskiyning aytishicha, uning ham ko‘plab g‘oyalariga “hech kim ishonmagan”.
Ukraina prezidentining qayd etishicha, Stiv Jobs o‘z karyerasini “bir qarashda tentakona g‘oyalar” bilan boshlagan. “Ukrainada ham xuddi shunday vaziyat mavjud. Bir safar ofisda jamoam bilan o‘tirib g‘oyalar ishlab chiqqanmiz, ularga esa hech kim ishonch bildirmagan va xuddi Stiv Jobsga tez-tez aytilgan so‘zlarni eshitganman — buning iloji yo‘q”.
Ukraina prezidenti Stiv Jobs oxir-oqibat muvaffaqiyat qozonganini ta’kidladi. “Hozir mening qo‘limda Jobs va Apple’ning ijod mahsuli – iPhone bor, bu Jobsning yuragi va u haliyam urib turibdi. Har bir SMS, har bir suhbat chog‘idagi vibratsiya uning yurak urishi ”, — deya qo‘shimcha qildi Zelenskiy.
Ukraina prezidenti AQShga amaliy tashrif bilan kelgan. 2-sentabr kuni Vladimir Zelenskiy Jo Bayden bilan uchrashdi, shundan so‘ng Vashington demokratiyani qo‘llab-quvvatlash uchun Kiyevga 463 million dollar, shuningdek, xavfsizlik yordami doirasida 60 million dollarga yaqin mablag‘ ajratishga qaror qildi. Tomonlar, shuningdek, mudofaa sohasidagi sheriklikning strategik asoslari to‘g‘risidagi bitimni imzoladi va ikki mamlakat o‘rtasida ishonchli aloqa liniyasi to‘g‘risida kelishib oldi.
Izoh (0)