Бухоро шаҳар аҳоли бандликка кўмаклашиш маркази инспектори фирибгарлик устида қўлга олинди, дея хабар бермоқда вилоят ИИБ ахборот хизмати.
Маълум қилинишича, хавфсиз ҳудуд кенг қамровли профилактик тадбирлари доирасида ҳуқуқни муҳофаза қилувчи идоралар ходимлари томонидан тезкор тадбир ўтказилган.
Унда Бухоро шаҳар аҳоли бандликка кўмаклашиш марказида ҳудудларни комплекс ривожлантириш бўйича секторларга бириктирилган ишга жойлаштириш инспектори, Бухоро шаҳар Ғиждувон кўчасида яшовчи, 1985 йилда туғилган М.А. исмли шахс хизмат мавқейидан фойдаланиб, ишсиз фуқаро Ш.Д. исмли аёлни Республика шошилинч тез ёрдам илмий маркази Бухоро филиалига 1 ҳисса кичик тиббиёт ходими вазифасига ишга жойлаштиришни ваъда қилиб, Бухоро шаҳар ҳокимлиги биноси олдида 500 АҚШ долларини олаётган вақтда ушланган.
Мазкур ҳолат юзасидан М.А.га нисбатан Жиноят кодексининг 168-моддаси (фирибгарлик) 3-қисми билан жиноят иши қўзғатилиб, дастлабки тергов ҳаракатлари олиб борилмоқда.
Бундан аввал Бухорода тиббиёт коллежига 400 доллар эвазига ўқишга киритишни ваъда қилган шахс ушлангани, Фарғонада фуқарога 10 сотих ерни 5500 долларга олиб беришни ваъда қилган шахс ушлангани ҳамда Қашқадарёда фирибгарлик жиноятини содир этиб, жавобгарликдан қочиб юрган косонлик фуқаро Деҳқонободда қўлга олингани ҳақида хабар берилганди.
Изоҳ (0)