Навоий вилоятида катта пул эвазига фуқарони ишга киритиб қўйишни айтган шифокор қўлга тушди, дея хабар бермоқда вилоят ИИБ ахборот хизмати.
Қайд этилишича, 2020 йил мансабини суиистеъмол қилгани боис, вилоят Соғлиқни сақлаш бошқармаси томонидан ҳайфсан олиб, шартли равишда Кармана тумани шошилинч тез тиббий ёрдам кўрсатиш бўлимида навбатчи шифокор лавозимига туширилган 1970 йилда туғилган С.Ф. пора билан қўлга тушди.
Шифокор аввал ўзи билан бирга ишлаган ҳамшира М.Т.ни кўриб қолиб, иш ўрни тавсия қилади. Ишга жойлаштиришда ваколати бўлмаса-да янгидан ишга тушган туғруқхонага танишлари орқали ишга киритиб қўйишини айтади. Бунинг учун 7 миллион сўм пул талаб қилади. Ҳамшира ҳозирги пайтда ишсиз бўлганлиги боис мазкур пулни беришга рози бўлади.
Навоий вилояти ИИБ ЖҚБ коррупция ва иқтисодий жиноятларга қарши курашиш ходимлари томонидан ўтказилган тезкор тадбир натижасида С.Ф. 7 миллион сўм пуллар ҳамда М.Т.нинг шахсий ҳужжатларини олаётган пайтда қўлга олинди.
Айни пайтда терговга қадар текширув ҳаракатлари олиб борилмоқда.
Бунда аввал Бухорода тиббиёт коллежига 400 доллар эвазига ўқишга киритишни ваъда қилган шахс ушлангани, Тошкентда фуқарони Қирғизистонга ўқишга киритиб, уни Тошкентдаги фармацевтика институтига кўчириб бериш учун 3,5 минг доллар сўраган шахс қўлга олингани ҳамда Хоразмда ёзган аризасини қайтариб олиш учун корхона раҳбаридан 180 миллион сўм талаб қилган шахс ушлангани ҳақида хабар берилганди.
Изоҳ (0)