Ўзбекистонлик таниқли рок гуруҳи жаҳон ҳамжамияти эътиборини Оролбўйи муаммосига қаратиш мақсадида ННТ тузмоқда

Ўзбекистонда Орол муаммосига бағишланган янгича форматдаги мусиқий клип суратга олинди. Мазкур тарона 3 тилда — ўзбек, қорақалпоқ ва рус тилларида бўлиб, унда дунё эътиборини Оролбўйи муаммосига қаратиш мақсад қилинган.

Электрооко гуруҳи ижросидаги «Эртанги кун» деб номланган мазкур клип Орол денгизининг қайтиши ҳақида бўлиб, у кенг қамровли лойиҳа — «Орол орзуси»га старт берди.

«Биз бу ишга барча мавжуд куч ва ресурсларни сарфладик: Оролбўйи муаммоси, иқлим ўзгариши ва минтақамизда сувни асраб қолишнинг аҳамиятига максимал даражада эътибор қаратиш учун жонли, сохталикдан йироқ санъат асари яратишни истадик. Дунё бўйлаб кўпроқ одамларда бетакрор Қорақалпоғистон, унинг халқи ва маданиятига қизиқиш уйғониши ҳамда уларда бу ерларни кўриш истаги туғилишига умид қилиб қоламиз», — дейди сценарий муаллифи, режиссёр ва продюсер, журналист Никита Макаренко.

Лойиҳа Ўзбекистон Миллий кинокомиссияси билан ҳамкорликда амалга оширилди. Ташкилотчиларга кўра, мусиқий видео Ўзбекистон мустақиллигининг 30 йиллигига ўзига хос совға бўла олади. Шунингдек, БМТ Бош Ассамблеясининг 2021 йилда Оролбўйи минтақасини «Экологик инновациялар ва технологиялар зонаси» деб эълон қилиш ҳақидаги резолюциясини қўллаб-қувватлайди.

Муаллифлар учун Ўзбекистоннинг космополитлигини намойиш этиш мақсадида, мусиқада бир нечта тиллардан иборат полифония яратиш муҳим аҳамиятга эга эди. Келажакда Ғарб юлдузларидан бири иштирокида клипнинг инглиз тилидаги версиясини яратиш режалаштирилган.

Бундан ташқари, «Орол орзуси» лойиҳаси келгусида ҳам Оролбўйи муаммоларини нафақат Ўзбекистон, балки жаҳон миқёсида ҳам кўтаришда давом этиш ниятида. Хусусан, Нукусда бир неча йўналишда бўлиб ўтадиган ранг-баранг фестиваллар, Игорь Савиский номидаги Қорақалпоқ давлат музейида ўтказиладиган «Сув ҳақидаги хотиралар» кўргазмаси, АҚШда ўтказиладиган хайрия бали, «Орол орзуси» мангасини чоп этиш ва бошқа лойиҳалар кўзда тутилган.

Мусиқий видеоклип Никита Макаренко ва Ўзбекистон миллий кинокомиссиясининг кенг қамровли «Орол орзуси» лойиҳасининг бошланиши ҳисобланади. Шунингдек, муаллифлар ва ҳамкорлар Оролбўйи муаммоларини жаҳон оммавий маданияти саҳнасига олиб чиқиш, шунингдек, минтақанинг маданий ва интеллектуал ривожланишига ҳар томонлама кўмаклашиш мақсадида худди шу номдаги нотижорат ташкилотини таъсис этишмоқда.