Prezidentning 28-avgustdagi qarori bilan Toshkentda S.A.Gerasimov nomidagi Butunrossiya davlat kinematografiya instituti federal davlat budjeti oliy ta’lim muassasasi filiali tashkil etildi, deb xabar bermoqda Adliya vazirligi matbuot xizmati.
Xabarga ko‘ra, filialda ta’lim faoliyati 2021/2022-o‘quv yilidan boshlanadi. Ta’lim jarayoni Kinematografiya agentligi bilan kelishgan holda BDKI tomonidan tasdiqlanadigan o‘quv reja va dasturlar asosida rus tilida olib boriladi, shu bilan birga unda o‘zbek tili va O‘zbekiston tarixi o‘qitiladi.
Dramaturgiya va prodyuserlik (turlari bo‘yicha) filialning asosiy ta’lim yo‘nalishlari va mutaxassisliklari hisoblanadi. Ta’lim kunduzgi, sirtqi shaklda hamda masofaviy tarzda yo‘lga qo‘yiladi.
Bitiruvchilarga O‘zbekistonda oliy ma’lumot sifatida tan olinadigan Rossiya davlat namunasidagi BDKI diplomi beriladi. Filialda davlat granti asosida ta’lim olgan bitiruvchilar 5 yildan kam bo‘lmagan muddatga majburiy ishlab berish sharti bilan kinokompaniyalar, teleradiokompaniyalar yoki kino va televideniye sohasidagi tashkilotlarga taqsimlanadi.
Butunrossiya davlat kinematografiya institutining Toshkent filialini ochish masalasi 2018-yildayoq ko‘zda tutilgandi. O‘zbekiston Prezidentining “Milliy kinoindustriyani rivojlantirish bo‘yicha qo‘shimcha chora-tadbirlar to‘g‘risida”gi qarorida ushbu institut filiali 2020/2021-o‘quv yilidan ochilishi belgilangandi.
Ma’lumot uchun, mazkur oliy ta’lim muassasasi kinematografchilarni yetishtirib beruvchi dunyodagi nufuzli ta’lim dargohlaridan biri bo‘lib, o‘zbek kinosi arboblarining ko‘pchiligi aynan mana shu muassasada bilim olgan.
Izoh (0)