Mustaqillik bayrami o‘tkaziladigan “Yangi O‘zbekiston” bog‘iga olib boruvchi yo‘lda transport harakati 3 kunga cheklanadi

Toshkent viloyatining poytaxtga tutash qismida, Qibray tumanida barpo etilgan “Yangi O‘zbekiston” bog‘ida Mustaqillikning 30 yilligi munosabati bilan bayram tadbirlari tashkil etilishi sababli ushbu bog‘ga olib boruvchi yo‘lda transport harakati cheklanadi.

YHXBB matbuot xizmati xabariga ko‘ra, 31-avgust hamda 1—2-sentabr kunlari mazkur bog‘ atrofida, Temur Malik hamda Ohangaron shohko‘chalari kesishmasidan boshlab Maxtumquli—Istiqlol avtomobil yo‘li bo‘ylab 4R-12 Bektemir—Chorbog‘ avtomobil yo‘ligacha bo‘lgan masofada transport vositalari harakati cheklanadi.

Tirbandliklarning oldini olish maqsadida haydovchilarga boshqa aylanma yo‘llardan foydalanish tavsiya etilgan.

Eslatib o‘tamiz, mamlakat mustaqilligining 30 yilligiga bag‘ishlangan asosiy bayram tadbiri Prezident Shavkat Mirziyoyev “Yangi O‘zbekiston” gazetasining 17-avgust kungi soniga bergan intervyusida ma’lum qilgandi. “Poytaxtimizga tutash 100 gektardan ortiq ulkan hududda ‘Yangi O‘zbekiston’ bog‘i hamda betakror Mustaqillik majmuasi jadal sur’atlar bilan bunyod etilmoqda. Nasib etsa, bu yil eng ulug‘, eng aziz bayramimizni mana shu yangi maydonda o‘tkazamiz”, — degan edi Prezident.